రాజీ మార్గంలో కేసులు పరిష్కరించాలి

దానవాయిపేట (రాజమహేంద్రవరం): రాజీ పడదగిన అన్ని రకాల కేసులను గుర్తించి పరిష్కరించే దిశగా చర్యలు తీసుకోవాలని ఉమ్మడి జిల్లా ప్రధాన న్యాయమూర్తి గంధం సునీత పేర్కొన్నారు. గురువారం రాజమహేంద్రవరం జిల్లా కోర్టులోని ప్రధాన న్యాయమూర్తి ఛాంబర్‌లో డీఎల్‌ఎస్‌ఏ జిల్లా కార్యదర్శి కె.ప్రకాష్‌బాబు ఆధ్వర్యంలో జిల్లాలోని వివిధ చిట్‌ఫండ్‌ సంస్థల ప్రతినిధులు, ఆ సంస్థల న్యాయవాదులతో సమావేశం జరిగింది. జూన్‌ 29న జరగనున్న జాతీయ లోక్‌ అదాలత్‌లో అధిక మొత్తంలో కేసులు పరిష్కరించడంతో పాటు బాధితులకు తగు పరిహారం అందించేందుకు తీసుకోవాల్సిన చర్యల గురించి ప్రధాన న్యాయమూర్తి చర్చించారు. పెండింగ్‌లో ఉన్న ఆయా సంస్థల సివిల్‌, కాంపౌండబుల్‌ క్రిమినల్‌ కేసులను గుర్తించి ఆ జాబితాను జిల్లా న్యాయసేవాధికార సంస్థకు అందజేయాలన్నారు. ఈ సమావేశంలో ఒకటో అదనపు జిల్లా న్యాయమూర్తి ఆర్‌.శివకుమార్‌, ఎనిమిదో అదనపు జిల్లా న్యాయమూర్తి వై.బి.నాయుడు, తొమ్మిదో అదనపు జిల్లా న్యాయమూర్తి ఎం.మాధురి, పదో అదనపు జిల్లా న్యాయమూర్తి ఆర్‌.శ్రీలత, రెండో అదనపు జూనియర్‌ సివిల్‌జడ్జి ఎ.కృష్ణప్రసాద్‌, అయిదో అదనపు జూనియర్‌ సివిల్‌జడ్జి జి.శ్రీనివాస్‌రెడ్డి, వివిధ సంస్థల న్యాయవాదులు పాల్గొన్నారు.