స్వచ్ఛ సర్వేక్షణ్‌ ర్యాంకింగ్‌లో జీఎంసీకి మరోసారి నిరాశే

నగరపాలకసంస్థ, న్యూస్‌టుడే: స్వచ్ఛ భారత్‌ మిషన్‌ జాతీయస్థాయిలో ప్రకటించిన స్వచ్ఛసర్వేక్షణ్‌- 2022 ర్యాంకింగ్‌లో ఈఏడాది కూడా గుంటూరు నగరపాలకసంస్థ(జీఎంసీ)కు నిరాశే ఎదురైంది. ఈఏడాది కూడా వందకు పైన ర్యాంకుతోనే సరిపెట్టుకోవాల్సి వచ్చింది. జీఎంసీ జాతీయస్థాయిలో 108వ ర్యాంకు, రాష్ట్ర స్థాయిలో 7వ ర్యాంకుతో సరిపెట్టుకుంది. స్వచ్ఛ సర్వేక్షణ్‌ ర్యాంకులు 2016 నుంచి జాతీయస్థాయిలో ప్రకటిస్తుండగా ఒక్కసారి కూడా నగరపాలకసంస్థ వంద లోపు ర్యాంకు సాధించలేక పోయింది. గతేడాది జాతీయస్థాయిలో 130వ స్థానం, రాష్ట్ర స్థాయిలో 5వ ర్యాంకు సాధించింది. చెత్త సేకరణకు 220 ఈ- ఆటోలు త్వరలోనే అందుబాటులోకి రానున్నందున ఇంటింటి చెత్త సేకరణ, తరలింపు, ఘన వ్యర్థాల నిర్వహణ, హోం కంపోస్ట్‌, ప్లాస్టిక్‌ నిషేధం పక్కాగా అమలు వంటి వాటిపై పకడ్బందీ చర్యలు చేపట్టాల్సిన అవసరం ఉందన్న అభిప్రాయం వ్యక్తమౌతుంది