జీఎంసీకి రూ.5 లక్షల జరిమానా

గుంటూరు వైద్యం, న్యూస్‌టుడే: గుంటూరు వైద్య కళాశాల(జీఎంసీ)లో ప్రస్తుతం ఉన్న 250 ఎంబీబీఎస్‌ సీట్లకు అనుగుణంగా తగినంత మంది బోధనానిపుణులు, ఇతర సదుపాయాలు లేనందున రూ.5 లక్షలు జరిమానా చెల్లించాలని జాతీయ వైద్య కమిషన్‌(ఎన్‌ఎంసీ) అధికారులు ఆదేశించారు. 2019లో జీఎంసీలో 250 సీట్లకు అనుమతి మంజూరు చేశారు. అయిదేళ్లు పూర్తయినందున ఆ సీట్ల గుర్తింపును పునరుద్ధరించాల్సిందిగా ప్రిన్సిపల్‌ ఎన్‌ఎంసీకి దరఖాస్తు చేశారు. ఎన్‌ఎంసీ నుంచి గతంలో వలే కళాశాలకు వచ్చి పరిశీలించకుండా వర్చువల్‌గానే దరఖాస్తులో ఉన్న వివరాలను పరిశీలించి నివేదిక రూపొందిస్తున్నారు. కొన్ని విభాగాల్లో వైద్యుల హాజరు 75 శాతం లేదని, ట్యూటర్లు, సహాచార్యుల కొరత ఉందని ప్రధానంగా లోపాలను ఎత్తి చూపారు. వీటిని సరిచేసుకునేందుకు ఆరు నెలల గడువు మంజూరు చేశారు.