యువకుల ప్రాణాలు కాపాడిన బీచ్‌ పోలీసులు

ప్రమాదం నుంచి బయటపడ్డ యువకులు భానుప్రకాష్‌, కిరణ్‌బాబుతో బీచ్‌ పోలీసులు

బాపట్ల, న్యూస్‌టుడే:  సూర్యలంక తీరంలో విహారానికి వచ్చి సముద్ర స్నానం చేస్తూ ప్రమాదవశాత్తు నీటిలో కొట్టుకుపోతున్న మంగళగిరికి చెందిన ఇద్దరు యువకుల ప్రాణాలను బీచ్‌ పోలీసులు బుధవారం కాపాడారు. మంగళగిరికి చెందిన వేశం భానుప్రకాష్‌, గాలి కిరణ్‌బాబు స్నేహితులతో కలిసి సూర్యలంక సముద్ర తీరానికి వచ్చారు. సముద్ర స్నానం చేస్తూ ఎక్కువ లోతుకు వెళ్లిన వారు అలల ఉద్ధృతికి కొట్టుకుపోతూ రక్షించమని కేకలు వేశారు. విధుల్లో ఉన్న బీచ్‌ పోలీసు సిబ్బంది, గజ ఈతగాళ్లు వెంటనే స్పందించి సముద్రంలోకి ఈదుకుంటూ వెళ్లి యువకుల ప్రాణాలు కాపాడి సురక్షితంగా ఒడ్డుకు చేర్చి ప్రాథమిక చికిత్స చేశారు. తమ ప్రాణాలను సైతం లెక్కచేయకుండా సముద్రంలోకి వెళ్లి యువకుల ప్రాణాలు కాపాడిన పోలీసు సిబ్బంది నాగరాజు, నరసింహమూర్తి, శ్రీనివాసరావు, నాగరాజు, గజ ఈతగాళ్లు సత్యనారాయణ, నాగేశ్వరరావు, ఆంజనేయులు, శివకోటేశ్వరరావును ఎస్పీ వకుల్‌ జిందాల్‌ అభినందించారు.