దోశలో ఇనుప వాషర్‌ బోల్ట్‌

పట్నంబజారు(గుంటూరు), న్యూస్‌టుడే: గుంటూరులోని కొందరు హోటల్స్‌ నిర్వాహకులు ఆహార పదార్థాల తయారీలో తీవ్ర నిర్లక్ష్యం ప్రదర్శిస్తున్నారు. గురువారం కొరిటెపాడులోని  ఓ హోటల్‌లో టిఫిన్‌ చేసేందుకు వెళ్లిన వినియోగదారుడికి ఎదురైన సంఘటనే తార్కాణం. ఒక వినియోగదారుడు తన స్నేహితులతో కలిసి టిఫిన్‌ చేసేందుకు ఆ హోటల్‌కు వెళ్లారు. ఆర్డర్‌ ఇచ్చిన దోశలో ఇనుప వాషర్‌ బోల్ట్‌ రావడంతో కంగుతిన్నారు. దీంతో విషయాన్ని హోటల్‌ యజమాని దృష్టికి తీసుకువెళ్లారు. వారు ఏమీ పట్టించుకోకపోవడంతో వారి మధ్య కొంతసేపు వాగ్వాదం జరిగింది. అనంతరం ఈ విషయాన్ని వినియోగదారులు ఆహార భద్రత నియంత్రణ శాఖ అధికారుల దృష్టికి తీసుకువెళ్లారు. ఈ విషయమై జిల్లా అసిస్టెంట్‌ ఫుడ్‌ కంట్రోలర్‌ నూతలపాటి పూర్ణచంద్రరావును ‘న్యూస్‌టుడే’ వివరణ కోరగా ఈ సంఘటన తమ దృష్టికి వచ్చిందన్నారు. హోటల్‌లో ఆహార పదార్థాలు తనిఖీ   చేసి నిబంధనలు పాటించకుంటే చర్యలు తీసుకుంటామన్నారు.