Trains: నేటి నుంచి ప్యాసింజర్‌ రైళ్ల రాకపోకలు

తాండూరు టౌన్‌ (న్యూస్‌టుడే): తొలి దశ కరోనా వ్యాప్తి నేపథ్యంలో గత ఏడాది విధించిన లాక్‌డౌన్‌తో ప్యాసింజర్‌ (అన్‌ రిజర్వ్‌డ్‌ ఎక్స్‌ప్రెస్‌) రైళ్ల రాకపోకలు నిలిచి పోయాయి. వైరస్‌ తగ్గుముఖం పట్టడంతో మధ్యలో ఎక్స్‌ప్రెస్‌ రైళ్లను మాత్రమే నడపటం ప్రారంభించారు. తాజాగా ప్యాసింజర్‌ రైళ్లను జులై 19 నుంచి నడపటానికి రైల్వే శాఖ నిర్ణయించింది. దీనికి అనుగుణంగా పదహారు నెలల తర్వాత ఫలక్‌నుమా నుంచి సికింద్రాబాద్‌ నుంచి వాడీ దాకా రాకపోకలు సాగనున్నాయి. ఫలక్‌నుమా నుంచి వాడీ వెళ్లే రైలు తాండూరుకు ఉదయం 8.50 గంటలకు వస్తుంది. సికింద్రాబాద్‌ నుంచి కలుబురిగి వెళ్లే రైలు ఉదయం 5.58 గంటలకు చేరుకుంటుంది. ఇన్నాళ్లూ ప్యాసింజర్‌ రైళ్లు తిరగనందున తాండూరు నుంచి హైదరాబాద్‌కు వెళ్లేందుకు ప్రయాణికులు, సామాన్యులు నానా అవస్థలు పడ్డారు. ఎంతో మంది ఉద్యోగులు, విద్యార్థులు, ఉపాధి కోసం యువత, కూలీలు హైదరాబాద్‌, వికారాబాద్‌, శంకర్‌పల్లి, సేడం, గుల్బర్గా వంటి ప్రాంతాలకు వెళ్లటానికి ప్రైవేటు వాహనాలను ఆశ్రయించి అధికంగా ఛార్జీలు చెల్లించాల్సి వచ్చింది. సోమవారం నుంచి ప్యాసింజర్‌ రైళ్లు అందుబాటులోకి వస్తుండటంతో వీరంతా సంతోషం వ్యక్తం చేస్తున్నారు.