సెప్టిక్‌ ట్యాంకు శుభ్రం చేస్తూ ఒకరి మృతి

పటాన్‌చెరు అర్బన్‌, న్యూస్‌టుడే: సెప్టిక్‌ ట్యాంకు శుభ్రం చేసేందుకు వచ్చి ఓ వ్యక్తి మృతి చెందగా ముగ్గురు అస్వస్థతకు గురయ్యారు. ఈ ఘటన పటాన్‌చెరు ఠాణా పరిధిలో జరిగింది. ఎస్సై రామునాయుడు తెలిపిన ప్రకారం.. పటాన్‌చెరు మండలం ఇస్నాపూర్‌లో ఉన్న కాకతీయ ఆసుపత్రి భవనంలో సెప్టిక్‌ ట్యాంక్‌ నిండటంతో భవన యజమాని రవీందర్‌ జస్ట్‌ డయల్‌ ద్వారా ఇచ్చిన నంబర్లకు ఫోన్‌ చేశాడు. నల్గొండ జిల్లా చందంపేట గ్రామం చిదిరియాల తండాకు చెందిన సుధాకర్‌ (25).. నందు, చందర్‌, ప్రవీణ్‌లతో సహా వచ్చాడు. అంతా శుభ్రం చేశాక నలుగురూ సెప్టిక్‌ ట్యాంకు లోపలకు దిగారు. అక్కడ విష వాయువులు వెలువడటంతో సుధాకర్‌ అక్కడికక్కడే మృతి చెందాడు. నందు, చందర్‌, ప్రవీణ్‌లు ముగ్గురూ తీవ్ర అస్వస్థతకు గురయ్యారు. పోలీసులు కేసు నమోదు చేసి దర్యాప్తు చేస్తున్నారు.