Hyderabad Police: చిట్టా తీసి చలానా వసూలు

ఈనాడు, హైదరాబాద్‌: నిబంధనలు ఉల్లంఘించి యథేచ్ఛగా తిరిగిన వాహనదారులు.. బకాయిలు పేరుకుపోవడంతో మరో బండి కొనుగోలు చేసి దానిపై ప్రయాణిస్తూ పట్టుబడమనే ధీమాతో ఉంటారు. ఇక ఇటువంటి ఉల్లంఘనుల నుంచి పాత జరిమానా వసూలు చేసేందుకు నగర ట్రాఫిక్‌ పోలీసులు సిద్ధమయ్యారు. నగరవ్యాప్తంగా స్పెషల్‌ డ్రైవ్‌ చేపట్టి కేసులు నమోదు చేయనున్నారు. నిత్యం 40 లక్షలకుపైగా వాహనాలు వివిధ మార్గాల్లో రాకపోకలు సాగిస్తుంటాయి. వీటిలో 70 శాతం ద్విచక్రవాహనాలు ఉంటున్నాయి. చలానా నుంచి తప్పించుకునేందుకు వాహనాల నంబరు ప్లేట్లను తొలగిస్తున్నారు. మరికొందరు పాతవి విక్రయించి కొత్త వాహనాలు కొనుగోలు చేస్తున్నారు. ఇక నుంచి ట్రాఫిక్‌ పోలీసులు తనిఖీల్లో యజమాని పేరుతో ఉన్న మిగిలిన వాహనాల వివరాలు బయటకు తీస్తారు. వాటిపై పాత చలానాలు ఉన్నట్లు గుర్తిస్తే వసూలు చేస్తారు.