అక్రమ బంధమే ఆయువు తీసింది

వీడిన మౌలానా మృతి మిస్టరీ

షానాబీ

ఘట్‌కేసర్‌, న్యూస్‌టుడే: అనుమానాస్పద స్థితిలో మృతి చెందిన వ్యక్తి మిస్టరీ వీడింది. వివరాల్లోకి వెళ్తే.. మేడ్చల్‌-మల్కాజిగిరి జిల్లా ఘట్‌కేసర్‌ ఠాణా పరిధి అవుషాపూర్‌కు చెందిన ఎస్‌కే మౌలానా(43) ఈ నెల 6న మృతి చెందాడు. నాలుగేళ్ల క్రితం బతుకుదెరువుకు దుబాయ్‌ వెళ్లాడు. రెండేళ్ల క్రితం తిరిగొచ్చి కూలీగా పనిచేస్తున్నాడు. ఆయనకు భార్య షానాబీ(40), ఇద్దరు పిల్లలున్నారు. విదేశానికి వెళ్లిన సమయంలో గ్రామానికి చెందిన ఓ వ్యక్తితో ఆమె వివాహేతర బంధం సాగించింది. అడ్డుగా ఉన్న భర్తను తొలగించుకోవాలని ప్రియుడితో కలిసి పథకం రచించారు.

పథకం ప్రకారమే.. : ఈ నెల 5న మద్యం కొనుగోలుకు మౌలానా భార్యను రూ.100 అడిగాడు. డబ్బులు లేవని, ఇంట్లో ఉన్న మద్యం సీసా ఇచ్చింది. అందులో విషం కలిపింది. తాగిన కొద్ది సేపటికే కడుపులో నొప్పిగా ఉందని చెప్పడంతో హడావుడిగా గాంధీ ఆసుపత్రికి తీసుకెళ్లింది. అక్కడి నుంచి ఈ నెల 6న నాగారంలోని ఓ ప్రైవేటు ఆసుపత్రికి తీసుకొచ్చింది. అక్కడ చికిత్స పొందుతూ మృతి చెందాడు. శవానికి పోస్టుమార్టం వద్దని భార్య చెప్పడంతో పోలీసులకు అనుమానం వచ్చి గ్రామంలో విచారణ చేపట్టారు. వైద్యులు నిర్వహించిన శవపరీక్షలో గుర్తు తెలియని విషం తాగినట్లు తేలింది. పోలీసులకు మరింత అనుమానం వచ్చి ఆమెను అదుపులోకి తీసుకొని విచారించారు. ప్రియుడి కోరిక మేరకు మద్యంలో విషం కలిపి ఇచ్చినట్లు ఒప్పుకొన్నట్లు సమాచారం. చెప్పినట్లు చేయకపోతే తనను చంపేస్తానని ప్రియుడు బెదిరించాడని చెప్పింది. పరారీలో ఉన్న ప్రియుడి కోసం పోలీసులు గాలిస్తున్నారు. ఆమెను అదుపులోకి తీసుకున్నామని, గురువారం కేసుకు సంబంధించిన పూర్తి వివరాలు వెల్లడిస్తామని సీఐ వి.అశోక్‌రెడ్డి ‘న్యూస్‌టుడే’తో చెప్పారు.