కాపురానికి రావడం లేదని భార్యపై కత్తితో దాడి

అమీర్‌పేట, న్యూస్‌టుడే: కాపురానికి రావడం లేదంటూ భార్యపై భర్త కత్తితో దాడి చేశాడు. బాధితురాలిని పోలీసులు ఆసుపత్రికి తరలించారు. ఎస్సార్‌నగర్‌ ఎస్‌ఐ ఆంజనేయులు తెలిపిన వివరాల ప్రకారం.. బోరబండకు చెందిన నమిత(29)కు గుంటూరుకు చెందిన నాగేశ్వర్‌రావు(35)తో 11ఏళ్ల కిందట పెళ్లి జరిగింది. వీరికి ఇద్దరు ఆడపిల్లలున్నారు. దంపతుల మధ్య మనస్పర్థలతో గతేడాది విడిపోయి వేర్వేరుగా ఉంటున్నారు. నమిత ఇద్దరు పిల్లలతో కలిసి బోరబండలో అద్దెకుంటుంది. నాగేశ్వర్‌రావు ఎల్బీనగర్‌లో మిత్రుడితో కలిసి ఉంటూ డ్రైవర్‌గా పనిచేస్తున్నాడు. భార్య కాపురానికి రావడం లేదనే కోపంతో ఆదివారం ఉదయం నాగేశ్వర్‌రావు బోరబండకు వచ్చాడు. నమితతో గొడవ పడుతూ కూరగాయల కత్తితో ఒక్కసారిగా దాడికి పాల్పడ్డాడు. గొంతు కోశాడు. తీవ్ర రక్తస్రావంతో నాగేశ్వర్‌రావును పట్టుకునేందుకు నమిత ప్రయత్నిస్తూ వెంబడించింది. రోడ్డుపైకి వచ్చి కుప్పకూలిపోయింది. స్థానికుల సమాచారంతో పోలీసులు వచ్చి గాంధీకి తరలించారు.  ఆమె పరిస్థితి విషమంగా ఉందని పోలీసులు తెలిపారు. నాగేశ్వర్‌రావు కోసం గాలిస్తున్నారు.