ఒకే పేరుతో ఇద్దరు అభ్యర్థులు

పేరే కాదు.. గుర్తును గుర్తుంచుకోవాల్సిందే

ఈనాడు, హైదరాబాద్‌: ఎన్నికల్లో పోటీ చేసే అభ్యర్థులకు గుర్తులే కాదు.. అప్పుడప్పుడు పేర్లు కంగారు పెడుతుంటాయి. ఒకే పేరుతో ఇద్దరు పోటీ చేసేటప్పుడు మరింత ఎక్కువ ఆందోళన ఉంటుంది.  ఇలాంటి ఇబ్బందికర పరిస్థితినే చేవెళ్ల నుంచి భాజపా తరుఫున పోటీ చేస్తున్న కొండా విశ్వేశ్వరరెడ్డి ఎదుర్కొంటున్నారు. దీనిపై ఆయన కోర్టును, ఎన్నికల కమిషన్‌ను ఆశ్రయించారు.

చేవెళ్ల నియోజకవర్గం నుంచి 43 మంది బరిలో ఉన్నారు. గుర్తింపు పొందిన పార్టీలు, నమోదైన పార్టీలు, స్వతంత్రులకు ఎన్నికల అధికారులు వరస సంఖ్య, ఎన్నికల గుర్తును కేటాయించారు. కొండా విశ్వేశ్వర్‌రెడ్డికి 2 నంబరు కేటాయించగా ఆయనది కమలం గుర్తు. ఆలిండియా ఫార్వర్డ్‌ బ్లాక్‌ పార్టీ తరుఫున పోటీ చేస్తున్న అభ్యర్థి పేరు కొండా విశ్వేశ్వర్‌రెడ్డి. ఆయనకు 4 నంబరు ఇవ్వగా గుర్తు సింహం. ఇలా పక్కపక్కనే ఒకే పేరు, ఇంటిపేరుతో ఉన్న ఇద్దరు అభ్యర్థులు ఉంటే ఓటర్లు పొరపడే అవకాశం ఉంటుందని అంటున్నారు. కాబట్టి పేరొక్కటే గుర్తుంటే సరిపోదు గుర్తు సైతం గుర్తుంచుకోవాలని అంటున్నారు.