రాజన్న క్షేత్రానికి భక్తుల తాకిడి

ఆలయ ప్రాంగణంలో భక్తులు

వేములవాడ, న్యూస్‌టుడే: దక్షిణ కాశీగా పేరొందిన ప్రసిద్ధ పుణ్యక్షేత్రమైన  వేములవాడలోని శ్రీరాజరాజేశ్వరస్వామి క్షేత్రానికి బుధవారం భక్తుల తాకిడి నెలకొంది. రాష్ట్రంలోని వివిధ ప్రాంతాలతో పాటు ఇతర రాష్ట్రాల నుంచి స్వామివారి దర్శనానికి భారీగా తరలి వచ్చారు. ఆలయ ప్రాంగణంలోని క్యూలైన్లు, పరిసరాలు సందడిగా మారాయి. ముందుగా ధర్మగుండంలో పుణ్యస్నానాలు ఆచరించిన అనంతరం  స్వామివారిని దర్శించుకున్నారు. రాజన్నకు ప్రీతి పాత్రమైన కోడె మొక్కులను కొందరు కుటుంబ సమేతంగా చెల్లించుకున్నారు. అభిషేకం, అన్నపూజ, కల్యాణాలు, కుంకుమ పూజలు వంటి వివిధ పూజా కార్యక్రమాల్లో పాల్గొని తరించారు. భక్తులకు ఇబ్బందులు కలగకుండా ఆలయ ఈవో కృష్ణ ప్రసాద్‌, అధికారులు పర్యవేక్షణ చేశారు. దాదాపు 15 వేల మంది స్వామివారిని దర్శించుకున్నట్లు ఆలయ అధికారులు పేర్కొన్నారు.