కైలాసంలో ఉద్యోగాలట!

నిత్యానంద

బెంగళూరు (మల్లేశ్వరం), న్యూస్‌టుడే : నిత్యానందస్వామి.. అందరికీ తెలిసిన వివాదాస్పద ఆధ్యాత్మికవేత్త.. తానే నిర్మించుకుని- ప్రకటించుకున్న కైలాస దేశంలో ఉద్యోగ అవకాశాలు ఉన్నాయట! భారతదేశంలోని తమ ప్రతినిధుల సహకారంతో ‘కైలాసం’లో ఉద్యోగాలు చేయవచ్చని సంస్థ ప్రతినిధులు అంతర్జాలంలో ప్రచారం చేసుకుంటున్నారు. భారతదేశంలోని తమ శాఖల్లో ఒక ఏడాది వేతనంతో కూడిన శిక్షణ పూర్తి చేసుకుని- అర్హత సాధించిన అభ్యర్థులకు కైలాసంలో పని చేసేందుకు అవకాశం ఇస్తామని పేర్కొన్నారు. నిత్యానంద హిందూ విశ్వ విద్యాలయం, విదేశాల్లోని దేవాలయాలు, భారతదేశంలోని కైలాస ఆలయాలు, కైలాస ఐటీ విభాగం, కైలాస రాయబార కార్యాలయం, విద్యుత్తు శాఖ, గ్రంథాలయం తదితరాల్లో ఖాళీలు ఉన్నాయని తెలిపారు. వీటిలో ఉచితంగా శిక్షణ పొందుతూనే వేతనాన్ని పొందవచ్చని నిత్యానంద తాను నిర్వహిస్తున్న సామాజిక మాధ్యమాల్లో ప్రకటనలు ఇచ్చారు. కొద్ది నెలల కిందటే నిత్యానంద ఆరోగ్య పరిస్థితి విషమించిందని, శ్రీలంకలో చికిత్సకు అవకాశం ఇవ్వాలని ఆయన భక్తులు అక్కడి ప్రభుత్వానికి విన్నవించారు. తాజాగా.. నిత్యానంద పేరిట వచ్చిన ప్రకటనలు ఆయన తొలి ఆశ్రమం విస్తరించిన కర్ణాటకలో ఆసక్తిని రేకెత్తించాయి.