‘అన్ని స్థానాల్లో పోటీ చేస్తాం’

మాట్లాడుతున్న కర్ణాటక రాష్ట్ర సమితి పార్టీ ఉపాధ్యక్షుడు లింగేగౌడ

హొసపేటె, న్యూస్‌టుడే : కర్ణాటక రాష్ట్ర సమితి పార్టీ నుంచి 224 స్థానాల్లోనూ అభ్యర్థులను పోటీలోకి దింపుతున్నామని ఆ పార్టీ రాష్ట్ర ఉపాధ్యక్షుడు ఎస్‌.హెచ్‌.లింగేగౌడ పేర్కొన్నారు. ఇప్పటికే 124 మంది అభ్యర్థుల పేర్లను వెల్లడించామన్నారు. ఆదివారం ఆయన ఇక్కడ నిర్వహించిన విలేకరుల సమావేశంలో మాట్లాడారు. విజయనగర జిల్లా నుంచి కణదాళు మంజునాథ(విజయనగర), సంతోష్‌ కుమార్‌(హడగలి), ఈడిగర కరిబసప్ప(హరపన హళ్లి) పోటీ చేస్తున్నారని వివరించారు. మరో వంద నియోజకవర్గాల్లో ధీటైన అభ్యర్థుల వేటలో ఉన్నామన్నారు. భారతీయ జనతాపార్టీ, కాంగ్రెస్‌, జేడీఎస్‌ మినహాయించి ఇతర పార్టీలవారితో పొత్తుకు సిద్ధంగా ఉన్నామన్నారు. ఆ మూడు పార్టీల్లో స్వార్థపరులు, బంధుప్రీతి ఉన్నవారే ఎక్కువ సంఖ్యలో ఉన్నారని ధ్వజమెత్తారు. ప్రధాన కార్యదర్శి సోమసుందర్‌, ఎస్సీ., ఎస్టీ., విభాగం రాష్ట్రాధ్యక్షుడు చంద్రశేఖర్‌ దొడ్డమని పాల్గొన్నారు.