ఎన్‌ఐఏ విస్తృత దాడులు

బెంగళూరు (శివాజీనగర), న్యూస్‌టుడే : రాజధాని నగరంలోని బ్రూక్‌ఫీల్డ్‌ రామేశ్వరం కేఫ్‌లో పేలుడు దర్యాప్తులో భాగంగా శివమొగ్గ, బెంగళూరు, తీర్థహళ్లి, హుబ్బళ్లి, చెన్నైలలో బుధవారం ఏకకాలంలో జాతీయ దర్యాప్తు దళం (ఎన్‌ఐఏ) అధికారులు దాడులు నిర్వహించారు. చెన్నైలో లాడ్జిల్లో  ఎక్కువ రోజుల నుంచి ఉంటున్న వారిని అదుపులోనికి తీసుకుని ప్రశ్నించారు. శివమొగ్గ, తీర్థహళ్లి, సొప్పుగుడ్డె చుట్టుపక్కల ప్రాంతాల్లో అనుమానిత తీవ్రవాదులు అబ్దుల్‌ మతిన్‌ తాహ, ముసావీర్‌ హుసేన్‌ శాహిజ్‌ ఇళ్లతో పాటు వారి బంధువులు, సన్నిహితుల నివాసాల్లో సోదాలు చేశారు. కేఫ్‌కు వచ్చి పేలుడు పదార్థాన్ని పెట్టి వెళ్లిన నిందితుతుడికీ, చెన్నైలో కొందరు యువకులకు ప్రత్యక్ష సంబంధాలు ఉన్నాయని గుర్తించారు. పేలుడు అనంతరం కేఫ్‌ పరిధిలోని మొబైల్‌ టవర్ల నుంచి వెళ్లిన ఫోన్‌ కాల్స్‌, ఇతర సమాచారం ఆధారంగా నిందితుల కోసం సీసీబీతో కలిసి ఎన్‌ఐఏ అధికారులు తమ కార్యాచరణను ముమ్మరం చేశారు.