కాంగ్రెస్‌ కార్యకర్తల ఆందోళన

దేవరాజేగౌడను అరెస్టు చేయాలని ఆందోళనకు దిగిన కాంగ్రెస్‌ కార్యకర్తలు

బెంగళూరు (యశ్వంతపుర), న్యూస్‌టుడే : హాసన లైంగిక వేధింపుల కేసులో కీలకమైన పెన్‌డ్రైవ్‌ వ్యవహారంలో కాంగ్రెస్‌కు వ్యతిరేకంగా తప్పుడు ప్రచారం చేయడంతో పాటు బెదిరింపులకు పాల్పడుతున్న భాజపా నేత దేవరాజేగౌడను తక్షణం అరెస్టు చేయాలని డిమాండ్‌ చేస్తూ మంగళవారం ఇక్కడ రేస్‌కోర్సు రోడ్డులో కాంగ్రెస్‌ కార్యకర్తలు ధర్నా నిర్వహించారు. ఈసందర్భంగా కేపీసీసీ ప్రధాన కార్యదర్శి మనోహర్‌ మాట్లాడుతూ భాజపా నేత దేవరాజేగౌడ మాజీ మంత్రి హెచ్‌.డి.రేవణ్ణ కుటుంబానికి వ్యతిరేకంగా పోరాడుతున్నారని, ఎంపీ ప్రజ్వల్‌ రేవణ్ణ కారుడ్రైవర్‌ కార్తిక్‌, భాజపా నేత దేవరాజేగౌడకు పెన్‌డ్రైవ్‌ ఇచ్చినట్లు ప్రకటించారని తెలిపారు. హాసన వీధుల్లో సామాజిక మాధ్యమాల్లో లైంగిక దౌర్జన్యాల సంఘటనలు ప్రసారం కావడానికి దేవరాజేగౌడ కారణమని ఆరోపించారు. ప్రజ్వల్‌ రేవణ్ణకు టికెట్‌ ఇవ్వకూడదని దేవరాజేగౌడ పోరాటం చేశారని, ఇప్పుడు ముఖ్యమంత్రి సిద్ధరామయ్య, ఉపముఖ్యమంత్రి డీకే శివకుమార్‌లకు వ్యతిరేకంగా తప్పుడు ప్రచారం చేస్తున్నారని మండిపడ్డారు. ప్రస్తుతం ఆయన జేడీఎస్‌ ఏజెంట్‌ తరహాలో వ్యవహరిస్తున్నారని ఆరోపించారు. ప్రత్యేక దర్యాప్తు దళం (సిట్‌) బృందం ఆయనను అరెస్టు చేసి విచారించాలని డిమాండు చేశారు.