గతమంతా ఘనం... ఇప్పుడంతా ధనం

ధరూరు, న్యూస్‌టుడే : ప్రధాన పార్టీల ప్రచారం, జాతీయ స్థాయి నేతలు సభలు జనసమీకరణకు ప్రస్తుతం అభ్యర్థులకు, నాయకులకు తలకుమించిన భారమే. భారీ సభలకు అంతే మొత్తంలో భారీగా డబ్బు ఖర్చు చేయాల్సి వస్తోందని అంటున్నారు. అభ్యర్థి మినహా, వెంట తిరిగే వారికి సైతం సాయంత్రానికి ముట్టజెప్పాల్సిందే అని వాపోతున్న పరిస్థితి ఉంది. ఎంత మారిపోయింది: గతంలో పార్టీలకు అంకితభావంతో పనిచేసే నాయకులు ఉండేవారు. పార్టీలను అంటిపెట్టుకొని అవసరమైతే జేబుల నుంచి ఖర్చు పెట్టి నాయకులను గెలిపించుకునే వారు. సుదూర ప్రాంతాల్లో సభలు జరిగినా అభిమానంతో స్వచ్ఛందంగా తరలివచ్చేవారు. రానురాను రాజకీయాల్లో మార్పులు వచ్చాయి. నాకొచ్చేదేమిటి అంటున్న వారి సంఖ్య పెరిగిపోయింది. దాంతో పాటు ఖర్చులు పెరిగిపోయాయి. జాతీయ స్థాయి నాయకులు వచ్చినప్పుడు రూ.అరకోటి వరకు పంచాల్సిన పరిస్థితి ఏర్పడుతోందని అంటున్నారు. వాహనాలు, భోజనాల ఖర్చు దీనికి అదనం. ఓ మండల కేంద్రంలో అభ్యర్థి ప్రచారానికి వస్తే వెయ్యి మంది జనసమీకరణకు రూ.రెండు లక్షలు పంచాల్సి వచ్చిందని సమాచారం. బాణసంచా, పూలదండలు, ఇతర డప్పులు, వాయ్యిదాల ఖర్చు దీనికి అదనం. ఇక పురపాలికల్లో, గ్రామాల్లో ఇంటింటి ప్రచారం కనీసం నేత వెంట ఓ 50 మంది ఉండాలి. నేత వెంట ప్రజలు నడవాలంటే రోజుకు ఉదయం సాయంత్రం కలిపి కనీసం రూ.25 వేలు చేతిలో ఉండాల్సిందేనని అంటున్నారు.