వేలిపై పెట్టే వీలు లేకుంటే..

న్యూస్‌టుడే, అచ్చంపేట: లోక్‌సభ ఎన్నికల పోలింగ్‌ ఈ నెల 13న జరుగనుంది. ఓటర్లు పోలింగ్‌ కేంద్రానికి వెళ్లి ఓటు హక్కు వినియోగించుకోవడానికి ముందు చెరిగిపోని సిరాను అంటిస్తారు. ఓటరు మళ్లీ రెండో సారి ఓటు వేసేందుకు అవకాశం లేకుండా ఈ నిబంధన విధించారు. ఓటు వేసి బయటకు వచ్చి చాలా మంది తాము ఓటు వేశామని తెలిపేందుకు సిరా అంటించిన వేలును చూపెడుతుంటారు. ఫోటోలు తీసుకొని సామాజిక మాధ్యమాల్లో పోస్టులు పెడుతుంటారు. ఓటు వేసేందుకు పోలింగ్‌ కేంద్రానికి వచ్చిన వ్యక్తి ఎడమ చేయి చూపుడు వేలి గోరుకు సిరా గుర్తు అంటిస్తారు. ఓటర్లకు సిరా అంటించాల్సిన వేలు లేని సందర్భంలో ఎక్కడ గుర్తు పెట్టాలన్న విషయంలో ఎన్నికల సంఘం ప్రత్యేక వివరణ ఇచ్చింది. ఓటరకు ఎడమచేతి చూపుడు లేనట్లయితే మధ్య వేలుకు సిరా గుర్తు పెట్టాల్సి ఉంటుంది. మధ్య వేలు కూడా లేని సందర్భంలో బొటన వేలుకు గుర్తు పెడతారు. ప్రత్యేక సందర్భాల్లో ఎవరికైనా ఎడమ చేతికి వేళ్లు లేకపోతే కుడి చేయి చూపుడు వేలుకు సిరా గుర్తు అంటిస్తారు. ఆ వేలు లేకుంటే మధ్య వేలు, ఆ తరువాత ఉంగరం వేలుకు సిరా అంటించాలన్న నిబంధన ఉంది. ఒక వేళ రెండు చేతులకు వేళ్లు లేకపోతే చేయి మధ్య భాగంలో లేదా పైభాగంలో భుజం వద్ద సిరా గుర్తు పెట్టాలని ఎన్నికల సంఘం నిబంధనలు పెట్టింది.