వైద్యులపై క్రిమినల్‌ కేసులు నమోదు చేయాలి

ఆర్‌ఎస్‌ ప్రవీణ్‌కుమార్‌

కట్టంగూరు చెర్వుఅన్నారంలో శిశువును చేతుల్లోకి తీసుకొని

అఖిల కుటుంబీకులను పరామర్శిస్తున్న

బీఎస్పీ రాష్ట్ర అధ్యక్షుడు ఆర్‌.ఎస్‌.ప్రవీణ్‌కుమార్‌

కట్టంగూరు, న్యూస్‌టుడే: నల్గొండ ప్రభుత్వ వైద్యశాలకు ప్రసవం కోసం వెళ్లిన అఖిల మృతికి కారణమైన వైద్యులపై క్రిమినల్‌ కేసులు నమోదు చేయాలని బీఎస్పీ రాష్ట్ర అధ్యక్షుడు ఆర్‌.ఎస్‌.ప్రవీణ్‌కుమార్‌ డిమాండ్‌ చేశారు. కట్టంగూరు మండలం చెర్వుఅన్నారంలో అఖిల కుటుంబీకులను ఆదివారం పరామర్శించారు. వైద్యుల నిర్లక్ష్యమే అఖిల మృతికి కారణమని ఆరోపించారు. బాధిత కుటుంబానికి రూ.కోటి ఎక్స్‌గ్రేషియా చెల్లించాలన్నారు. కుటుంబ నియంత్రణ శస్త్రచికిత్సలు వికటించి నలుగురు, ప్రసవం కోసం వెళ్లిన అఖిల వైద్యుల నిర్లక్ష్యం వల్లే మృతిచెందారన్నారు. ప్రభుత్వ వైద్యశాలల్లో బాధితులు మృతిచెందిన ఘటనలపై, భవిష్యత్తులో ఇలాంటివి పునావృతం కాకుండా ఉండేందుకు జుడీషియల్‌ విచారణ జరిపించాలని కోరారు. కార్యక్రమంలో పార్టీ నియోజకవర్గ ఇన్‌ఛార్జి మేడి ప్రియదర్శిని, నాయకులు పాల్గొన్నారు.