పల్లెప్రగతి పరిశీలనకు సీఎంవో బృందం

ఒకట్రెండు రోజుల్లో జిల్లా పర్యటన

ఈనాడు డిజిటల్‌, కామారెడ్డి : పల్లెప్రగతి కార్యక్రమాన్ని ప్రతిష్ఠాత్మకంగా తీసుకున్న ప్రభుత్వం క్షేత్రస్థాయిలో అమలు తీరును తెలుసుకునేందుకు కార్యాచరణ సిద్ధం చేసింది. ఇందులో భాగంగా ఈ నెలాఖరులోపు జిల్లాలో సీఎంవో బృందం పర్యటించే అవకాశాలున్నాయి. గ్రామాలను ఆకస్మికంగా తనిఖీ చేయనున్నట్లు సమాచారం. ఈ బృందంలో సీఎం ప్రత్యేక కార్యదర్శితో పాటు పంచాయతీరాజ్‌, గ్రామీణాభివృద్ధి, అటవీశాఖల అధికారులున్నట్లు తెలుస్తోంది. ఇది తెలిసిన జిల్లా యంత్రాంగం పల్లెప్రగతిలో నిర్దేశిత పనులను పూర్తి చేయడంపై ప్రత్యేక దృష్టి సారించింది.  

నివేదికల తయారీలో నిమగ్నం : ఈ నేపథ్యంలో పంచాయతీరాజ్‌, గ్రామీణాభివృద్ధిశాఖల అధికారులు నివేదికల తయారీలో నిమగ్నమయ్యారు. ఇటీవల జిల్లాలో కేంద్ర బృందం పర్యటించిన సమయంలో ఉపాధి పనులకు సంబంధించిన ఏడు రిజిస్టర్లు కోరారు. అందుబాటులో లేవనడంతో అసంతృప్తి వ్యక్తం చేశారు. ఈ నేపథ్యంలో పంచాయతీల్లో అన్ని రకాల రికార్డులు అందుబాటులో ఉంచేలా ఏర్పాట్లు చేస్తున్నారు. మూడు రోజుల నుంచి అధికారులు క్షేత్రస్థాయిలో పర్యటిస్తూ ఆయా విభాగాల సిబ్బందిని అప్రమత్తం చేస్తున్నారు.