ఖాళీ బిందెలతో మహిళల నిరసన

నవరంగ్‌పూర్‌: నవరంగ్‌పూర్‌ జిల్లాలో 35 ఏళ్లుగా తమ గ్రామానికి త్రాగునీటి, రహదారి సదుపాయం లేక అవస్థలు పడుతున్నామని పలువురు నిరసన తెలిపారు. ఈ విషయమై అధికారుల దృష్టికి తీసుకెళ్లినా ఫలితం లేకపోవటంతో సదరు సమితి హిర్లి దంగరి మహిళలు ఖాళీ బిందెలతో శుక్రవారం నవరంగ్‌పూర్- కోరాపుట్ రహదారిపై బైఠాయించి ఆందోళనకు దిగారు. గ్రామంలో యంత్రాంగం కేవలం ఒక ట్యాంకును ఏర్పాటు చేసిందని చెప్పారు. అయినా సరిపడా నీటి సరఫరా జరగటంలేదని వాపోయారు. అధికారులు స్పందించి నీటి సమస్య తీర్చాలని కోరుతున్నారు. నిరసన వల్ల ట్రాఫిక్‌ అంతరాయం ఏర్పడింది. విషయం తెలుసుకున్న నీటి సరఫరా శాఖ ఇంజినీర్ హరిష్ చంద్ర ప్రధాన్ ఘటనా స్థలానికి చేరుకొని నీటి సమస్యను తీర్చుతామని హామీ ఇచ్చారు. మహిళలు ఆందోళన విరమించారు.