ఈ-వాహనాలతోే పర్యావరణ పరిరక్షణ

ఆటో నడిపి పనితీరు పరిశీలిస్తున్న కలెక్టర్‌ దినేష్‌ కుమార్‌

విద్యుత్తు వాహనాలను ఎక్కువ మంది వినియోగించడం ద్వారా పర్యావరణ పరిరక్షణతో పాటు; రోజురోజుకు తరిగిపోతున్న ఇంధన వనరులను ఆదా చేయొచ్చని కలెక్టర్‌ దినేష్‌ కుమార్‌ అన్నారు. విద్యుత్తు వాహనాల వినియోగంపై గురువారం అవగాహన ర్యాలీ నిర్వహించారు. నెడ్‌క్యాప్‌ ఆధ్వర్యంలో చేపట్టిన ఈ కార్యక్రమాన్ని ఒంగోలు ప్రకాశం భవన్‌లో కలెక్టర్‌ దినేష్‌ కుమార్‌ జెండా ఊపి ప్రారంభించారు. ఈ సందర్భంగా ఆయన మాట్లాడుతూ.. పెట్రోల్‌, డీజిల్‌ వాహనాల వినియోగం కారణంగా వాతావరణ కాలుష్యం పెరుగుతోందని, ప్రత్యామ్నాయంగా బ్యాటరీతో నడిచే ఈ-ద్విచక్ర వాహనాలను ఉపయోగిస్తే కాలుష్యంతో పాటు, ఇంధన ఖర్చు బాగా  తగ్గుతుందన్నారు. ఇందుకుగాను ఈ-ద్విచక్ర వాహనాలు, కార్లను కేంద్ర, రాష్ట్ర ప్రభుత్వాలు ఎక్కువగా ప్రోత్సహిస్తున్నట్టు చెప్పారు. తొలుత ఈ-ఆటో, ఈ-వాహనాలను ఆయన స్వయంగా నడిపి పరిశీలించారు. కార్యక్రమంలో నెడ్‌క్యాప్‌ డీజీఎం హరనాథ్‌బాబు, పీసీబీ ఈఈ నాగిరెడ్డి తదితరులు పాల్గొన్నారు.
- న్యూస్‌టుడే, ఒంగోలు గ్రామీణం