సార్వత్రిక రణం.. హోరెత్తనున్న ప్రచార పర్వం

ముగిసిన నామపత్రాల ఉపసంహరణ
తేలిన బరిలో నిలిచిన అభ్యర్థుల లెక్క

ఈనాడు, ఒంగోలు: సార్వత్రిక ఎన్నికలకు సంబంధించి ఏప్రిల్‌ 18న ఎన్నికల నోటిఫికేషన్‌ వెలువడటంతో నామినేషన్ల పర్వం మొదలై ఈ నెల 25 వరకు కొనసాగింది. ఒంగోలు పార్లమెంట్‌ స్థానానికి 32 మంది 61 సెట్లు దాఖలు చేశారు. మిగిలిన అసెంబ్లీ స్థానాలకు 206 మంది 354 నామపత్రాలు అందజేశారు. ఈ నెల 26న అధికారులు పరిశీలన చేపట్టి పార్లమెంట్‌ స్థానంలో ఏడింటిని తిరస్కరించి ఇరవై అయిదింటికి ఆమోదం తెలిపారు. అసెంబ్లీ స్థానాల్లో 48 తిరస్కరించి.. 158 ఆమోదించారు. నామినేషన్ల పర్వంలో చివరి అంకమైన ఉపసంహరణ ముగియడంతో బరిలో నిలిచిన అభ్యర్థుల లెక్క తేలింది. ఒంగోలు పార్లమెంట్‌ బరి నుంచి ఎవరూ ఉపసంహరించుకోకపోవడంతో తెదేపా, వైకాపాతో పాటు 25 మంది అభ్యర్థులు పోటీలో నిలిచారు. అసెంబ్లీ నియోజకవర్గాల్లో మొత్తంగా 19 ఉపసంహరించుకోగా 139 మంది మిగిలారు. ఇకపై వీరంతా పదమూడు రోజులపాటు ప్రచారాన్ని హోరెత్తించనున్నారు. ఒక నియోజకవర్గంలో 15 మంది అభ్యర్థులు, ఒక నోటాతో కలిపి 16 మందికి అవకాశం ఉంటుంది. బరిలో అంతకంటే ఎక్కువ మంది ఉంటే అక్కడ రెండు ఈవీఎంలను వినియోగించాల్సి వస్తుంది. ఆ ప్రకారం ఒంగోలు పార్లమెంట్‌ స్థానంతో పాటు గిద్దలూరు, మార్కాపురం, ఒంగోలు నియోజకవర్గాలకు రెండు ఈవీఎంలను ఈ ఎన్నికల్లో వినియోగించనున్నారు.