వైద్యఆరోగ్య శాఖలో బదిలీల సందడి

గుజరాతీపేట(శ్రీకాకుళం), న్యూస్‌టుడే: వైద్య ఆరోగ్యశాఖలో బదిలీల సందడి ప్రారంభమైంది. ప్రభుత్వం దీనికి సంబంధించిన జీవోను శుక్రవారం విడుదల చేసింది. ఒకేచోట అయిదేళ్లుగా పనిచేస్తున్న వారంతా బదిలీలకు అర్హులని అందులో పేర్కొంది. ఫిబ్రవరి 1 నుంచి 8వ తేదీ వరకు దరఖాస్తులు చేసుకోవాలని, 28లోగా బదిలీల ప్రక్రియ ముగుస్తుందని అందులో వెల్లడించింది. ఈ క్రమంలో జిల్లాలో ఆఫీస్‌ సబార్డినేట్‌ పోస్టు నుంచి గెజిటెడ్‌ వారీగా బదిలీలకు అర్హుల జాబితా తయారీలో సంబంధిత విభాగాల వారు కసరత్తు ప్రారంభించారు. జిల్లాలో 700 మందికి పైగా స్థానచలనం కలగనున్నట్లు సమాచారం. ఫిబ్రవరిలో బదిలీలు ఉండటంతో ఆయా వర్గాలు ఒకింత అసహనం వ్యక్తం చేస్తున్నాయి. ఈ విషయమై డీఎంహెచ్‌వో డాక్టర్‌ బి.జగన్నాథరావు మాట్లాడుతూ బదిలీల ప్రక్రియను నిబంధనల మేరకు పారదర్శకంగా నిర్వహిస్తామని స్పష్టం చేశారు.