మహిళల భద్రత కోసమే 112: ఎస్పీ

శ్రీకాకుళం నేరవార్తావిభాగం, న్యూస్‌టుడే: మహిళల భద్రత కోసం 112 టోల్‌ ఫ్రీ నంబరును అందుబాటులోకి తీసుకువచ్చామని, ఆ నంబరుకు కాల్‌ చేస్తే ఒంటరి మహిళలను రాత్రి వేళల్లో పోలీసు వాహనాల్లో సురక్షితంగా ఇంటి వద్దకు తీసుకువెళ్తారని ఎస్పీ జి.ఆర్‌.రాధిక బుధవారం ఒక ప్రకటనలో తెలిపారు. ఎలాంటి రవాణా సౌకర్యం లేక ఇంటికి చేరుకోలేని మహిళల కోసం ‘నైట్‌ డ్రాప్‌ టు హోం’ అనే ప్రత్యేక కార్యక్రమాన్ని ప్రవేశపెడుతున్నట్లు వివరించారు. రాత్రి 11 గంటల తర్వాత అధైర్య పడకుండా 112 టోల్‌ ఫ్రీ నంబరుకు ఫోన్‌ చేస్తే సంబంధిత పోలీసులు సబ్‌ డివిజన్‌ పరిధిలోని, అందుబాటులో ఉన్న పోలీసు వాహనం ద్వారా సురక్షితంగా మీ ఇంటికి చేర్చుతారన్నారు.