27న పాలిసెట్‌-2024

ఎచ్చెర్ల, న్యూస్‌టుడే: పదోతరగతి ఉత్తీర్ణులైన విద్యార్థులు పాలిటెక్నిక్‌ కోర్సుల్లో ప్రవేశాలు కల్పించేందుకు ప్రభుత్వం నిర్వహిస్తోన్న ఏపీ పాలిసెట్‌-2024 ప్రవేశ పరీక్ష ఈ నెల 27న  నిర్వహించేందుకు అధికారులు సన్నాహాలు చేస్తున్నారు. పాలిసెట్‌ పరీక్ష జిల్లా సమన్వయకర్తలు గురుగుబెల్లి దామోదరరావు, ఏ.గోపి మాట్లాడుతూ శ్రీకాకుళం డివిజన్‌ పరిధిలో మొత్తం 26 కేంద్రాల్లో 7,178 విద్యార్థులు, టెక్కలి డివిజన్‌ పరిధిలో 16 కేంద్రాల్లో 4,756 మంది మొత్తం జిల్లా వ్యాప్తంగా 42 కేంద్రాల్లో 11,934 మంది విద్యార్థులు పరీక్షకు దరఖాస్తు చేసుకున్నారని చెప్పారు. పరీక్ష ఉదయం 11 గంటల నుంచి 1 గంట వరకు ఓఎంఆర్‌ షీట్‌ విధానంలో జరుగుతుందన్నారు. అభ్యర్థులు పరీక్ష కేంద్రానికి గంట ముందు రావాలని ఒక్క నిమిషం ఆలస్యమైనా అనుమతించమన్నారు.