పోస్టల్‌ బ్యాలెట్ ఓటింగ్‌ ప్రారంభం

శ్రీకాకుళంలో పోలింగ్‌ కేంద్రం వద్ద సాయంత్రం 5 గంటల తరువాత క్యూలైన్‌లో వేచి ఉన్న ఓటర్లు

కలెక్టరేట్‌(శ్రీకాకుళం), న్యూస్‌టుడే: జిల్లాలో సార్వత్రిక ఎన్నికల పోస్టల్‌ బ్యాలెట్‌ ఓటింగ్‌ శనివారం ప్రారంభమైంది. మొత్తం 8 నియోజకవర్గాల పరిధిలో ప్రక్రియ నిర్వహించారు. జిల్లావ్యాప్తంగా 25,505 మందికి తొలిరోజు 7,004 మంది ఓటేశారు. ఉదయం 9 గంటలకు ప్రారంభమైన ఓటింగ్‌ ప్రక్రియ సాయంత్రం 5 గంటల వరకు కొనసాగింది. తొలిరోజు పీవో, ఏపీవో సూక్ష్మపరిశీలకులు, హోం ఓటింగ్‌ పోలీసు సిబ్బంది, తదితరులకు ఓటు వేయాలని నిర్దేశించినప్పటికీ.. 5, 6 తేదీల్లో కేటాయించిన సిబ్బంది కూడా ఓటింగ్‌కు రావడంతో తొలి రోజు అన్ని కేంద్రాల వద్ద రద్దీ కనిపించింది. శ్రీకాకుళం నియోజకవర్గంలో అత్యధికంగా.. ఎచ్చెర్లలో అత్యల్పంగా సిబ్బంది ఓటు హక్కును వినియోగించుకున్నారు. 7వ తేదీ వరకు పోస్టల్‌ బ్యాలెట్‌ ప్రక్రియ కొనసాగనుంది.