చిట్టీవ్యాపారిని చుట్టుముట్టిన బాధితులు

సబితాదేవిని నిలదీస్తున్న మహిళ

టెక్కలి పట్టణం, న్యూస్‌టుడే: టెక్కలిలో చిట్టీల పేరుతో మోసం చేసి పరారైన మహిళ సబితాదేవిని బాధితులు మంగళవారం చుట్టుముట్టారు. ముఖానికి వస్త్రం కట్టుకొని స్థానిక బ్యాంకులో బంగారం ఆభరణాలపై ఉన్న రుణాన్ని రెన్యువల్‌ చేసుకునేందుకు వచ్చి వెళ్తుండగా ఆమెను గుర్తించి అడ్డుకున్నారు. బకాయిలు చెల్లించాలని గట్టిగా నిలదీశారు. అయితే ఆమె తనచున్నీతో మెడకు గట్టిగా బిగించుకుని స్థానికులను భయపెట్టడంతో అంతా ఎదురుతిరిగారు. సుమారు 175 మందికి రూ.3 కోట్ల వరకు ఆమె టోకరా వేసినట్లు బాధితులు చెబుతున్నారు. ఇప్పటికే ఆమె ఐపీ పెట్టి 15 మందికి కోర్టు ద్వారా నోటీసులు పంపించారు. ఆమె మెడలోని బంగారు ఆభరణాలను పలువురు బాధితులు బలవంతంగా లాక్కోవడం వివాదాస్పదమైంది. కాసేపటికి ఆమెను స్థానిక పోలీస్‌ స్టేషన్‌కు తరలించారు. ఇది వరకే సబితాదేవిపై కేసు నమోదు అయిందని బెయిల్‌పై బయట ఉందని పోలీసులు తెలిపారు.