నైపుణ్యాభివృద్ధి కేంద్రానికి... 5 ఎకరాల స్థలం

గాజువాక, న్యూస్‌టుడే: గాజువాక బీసీరోడ్డు సమీప 21 ఎకరాల విస్తీర్ణంలో ఉన్న ప్రభుత్వ స్టీల్‌సిటీ ఐటీఐ ప్రాంగణంలో నైపుణ్యాభివృద్ధి కేంద్రం ఏర్పాటుకు 5 ఎకరాల స్థలాన్ని కేటాయించారు. పారిశ్రామిక ప్రాంతంలో ఔత్సాహిక యువతను వివిధ రంగాల్లో నిపుణులుగా తయారు చేయడానికి మెరుగైన అవకాశాలు ఉన్నట్లు గుర్తించిన జిల్లా యంత్రాంగం ఇటీవలే సర్వే చేసి స్థలాన్ని సేకరించినట్లు ఐటీఐ వర్గాలు తెలిపాయి. ప్రస్తుతం నగరంలోని ఆరిలోవలో మాత్రమే నైపుణ్యాభివృద్ధి కేంద్రం నడుస్తోంది. నూతన కేంద్రంలో ఐటీఐ, డిప్లమో, 7, 8 తరగతులు చదివిన వారికి స్వల్పకాలిక కోర్సులు అందుబాటులోకి వస్తాయని సంబంధిత వర్గాలు తెలిపాయి.