ఉద్యోగుల ఓట్లు ఏకపక్షమే: సీఎం రమేశ్‌

పెందుర్తి, న్యూస్‌టుడే: పోస్టల్‌ బ్యాలెట్లో ఉద్యోగుల వేస్తున్న ఓట్లు ఏక పక్షమేనని అనకాపల్లి పార్లమెంటు కూటమి(భాజపా) అభ్యర్థి సీఎం రమేశ్‌ స్పష్టం చేశారు. పెందుర్తి మండల పరిషత్‌ కార్యాలయం వద్ద జరుగుతున్న పోస్టల్‌ బ్యాలెట్ పోలింగ్‌ కేంద్రాన్ని బుధవారం ఆయన పరిశీలించారు. అనంతరం విలేకరులతో మాట్లాడారు. పోస్టల్‌ బ్యాలెట్ కేంద్రంలో వైకాపా ఏజెంట్లు లేరంటే పరిస్థితి ఎలా ఉందో అర్థం చేసుకోవచ్చన్నారు. ఉద్యోగుల ఓట్లు కూటమికే ఉన్నాయన్నారు. ఉద్యోగులతో పాటు వారి బంధువుల ఓట్లు కూడా కూటమికే వస్తాయని పేర్కొన్నారు. వైకాపా పార్టీ గాలికి కొట్టుకుపోతుందన్నారు. సీఎం జగన్‌ జూన్‌ 5న ఊరికి వెళ్తారా..? గవర్నర్‌కు రాజీనామా సమర్పిస్తారా..? తేల్చుకోవాలని పేర్కొన్నారు. కార్యక్రమంలో తెదేపా, భాజపా, జనసేన నాయకులు రెడ్డి నారాయణరావు, గొర్లె రామునాయుడు, గండ్రెడ్డి నగేశ్‌, శానాపతి సోమశేఖర్‌నాయుడు, బైలపూడి హరగోపాల్‌, తదితరులు పాల్గొన్నారు.