పోటెత్తిన పోస్టల్‌ బ్యాలెట్‌ ఓటర్లు

ఓటు వేసేందుకు బారులుతీరిన ఓటర్లు

ములుగు, న్యూస్‌టుడే: ములుగులోని సంక్షేమ భవన్‌లో ఏర్పాటు పోస్టల్‌ బ్యాలెట్‌ ఓటింగ్‌కు ఓటర్లు రెండో రోజు పోటెత్తారు. బారులుతీరడంతో.. సంక్షేమ భవన్‌ కిటకిటలాడింది. సోమవారం జరిగిన పోలింగ్‌లో 527 మంది తమ ఓటు హక్కును సద్వినియోగం చేసుకున్నారు. రెండురోజుల్లో మొత్తం 785 మంది ఓటు వేశారు. ఇంటి నుంచి వేయడానికి మొత్తం 77 మంది దరఖాస్తు చేసుకోగా 74 మంది ఓటు హక్కు వినియోగించుకున్నారు. మరో ముగ్గురి కోసం అధికారులు ప్రయత్నించినా.. వారు అనారోగ్య కారణాలతో గ్రామంలో అందుబాటులో లేకపోవడంతో సద్వినియోగం చేసుకోలేకపోయారు. పోస్టల్‌ బ్యాలెట్‌కు దరఖాస్తు చేసుకున్న వారిలో కొందరికి సాంకేతిక కారణాలతో ఓటు వేయడానికి అవకాశం రాలేదు. వీరి కోసం సోమవారం అర్ధరాత్రి వరకు దరఖాస్తు చేసుకోవాలని ఎన్నికల కమిషన్‌ అవకాశం కల్పించింది.