ఫిలిప్పీన్స్‌ విహంగం.. పెలికాన్‌

కొల్లేరు అతిథి

కైకలూరు గ్రామీణం, న్యూస్‌టుడే: కొల్లేరుకు వచ్చే అందాల అతిథి స్పాట్‌ బిల్డ్‌ పెలికాన్‌. స్థానికంగా దీనిని గూడబాతు అని పిలుస్తారు. ఇది 4 నుంచి 6 కిలోల వరకు బరువు ఉంటుంది. ఫిలిప్పీన్స్‌ దేశంలో పుట్టి అక్కడి నుంచి విస్తరించినట్లు పరిశీలకులు చెబుతున్నారు. సంతానోత్పత్తి కాలంలో మాత్రమే గుంపులుగా వలస వెళ్తాయి. తక్కువ నీటిమట్టం ఉన్న ప్రాంతాలను ఆవాసంగా చేసుకుని చేపలను వేటాడతాయి. గడ్డి, ఎండిపుల్లలతో 15 నుంచి 20 అంగుళాల చుట్టు కొలతతో గూడు ఏర్పాటు చేసుకుంటాయి. 3 నుంచి 5 గుడ్లు పెట్టి పొదిగి పిల్లలను చేస్తాయి. మనదేశంతో పాటు శ్రీలంక, కంబోడియా, దక్షిణ తూర్పు ఆసియాలో మాత్రమే నివాసం ఉంటాయి. ప్రస్తుతం ఈ జాతి పక్షులు 18 వేల వరకు ఉంటాయని అటవీశాఖ అధికారుల అంచనా.