రూ.5 పెరిగిన పొగాకు ధర

జంగారెడ్డిగూడెం, న్యూస్‌టుడే: ఎన్‌ఎల్‌ఎస్‌లోని గోపాలపురం పొగాకు వేలం కేంద్రంలో గురువారం గరిష్ఠ ధర కేజీకి రూ.5 పెరిగి రూ.240 నుంచి రూ.245కు చేరింది. ఒక్క బేలుకు మాత్రమే ఈ పెరుగుదల నమోదైంది. జంగారెడ్డిగూడెం ఒకటి, రెండు, కొయ్యలగూడెం, దేవరపల్లిలో మాత్రం రూపాయి చొప్పున పెరుగుదల నమోదై రూ.241కు చేరింది. ఈ పెరుగుదల కూడా కొనుగోలు కేంద్రాల్లో రెండు, మూడు బేళ్లకే పరిమితం అవుతోంది. పొగాకు కంపెనీలు ఇష్టపూర్వకంగా పెంచిన ధరలు కావని అధికారులు, రైతులు చెబుతున్నారు. బయ్యర్లు ఆన్‌లైన్‌లో నమోదు చేసే సమయంలో పొరపాటున అక్కడక్కడ ఎక్కువ నమోదవడమే దీనికి కారణమంటున్నారు. జంగారెడ్డిగూడెం ఒకటో కేంద్రంలో రెండు, రెండో కేంద్రంలో ఒక బేలుకు ఒక రూపాయి చొప్పున పెంచి రూ.241కు కొనుగోలు చేశారు.