ఎమ్మెల్యే రవీంద్రనాథ్‌రెడ్డిపై ఎన్నికల సంఘానికి ఫిర్యాదు

ఈనాడు, కడప : సీఎం జగన్‌ మేనమామ, కమలాపురం ఎమ్మెల్యే రవీంద్రనాథ్‌రెడ్డిపై వీరపునాయునిపల్లెకు చెందిన నాగప్రసాద్‌ ఎన్నికల సంఘానికి ఫిర్యాదు చేశారు. నివాసం లేని భవనం పేరిట కమలాపురంలో ఓటరుగా నమోదు చేసుకున్నారని ఫిర్యాదులో పేర్కొన్నారు. 2014లో కడప నగరంలోని స్మిత్‌రోడ్డు వైపునున్న నివాసం చిరునామాతో ఓటరు కార్డు తీసుకున్నారని పేర్కొన్నారు. 2019లో కమలాపురంలో 14/414 చిరునామా ఉన్న భవనం పేరిట ఓటరుగా నమోదు చేసుకున్నారని వివరించారు. ఓటరు కార్డులోని చిరునామా మేరకు నివాసం లేరని, ఓటరు కార్డు, ఆధార్‌కార్డులో చిరునామాలు వేర్వేరుగా ఉన్నాయని ఫిర్యాదులో పేర్కొన్నారు. ఎమ్మెల్యేగా ఉన్న వ్యక్తి తప్పుడు సమాచారంతో ఓటరు నమోదు చేసుకోవడం, దాని ఆధారంగా నామినేషన్‌ దాఖలు చేశారని, దాన్ని తిరస్కరించాలని ఫిర్యాదులో ఎన్నికల సంఘాన్ని కోరారు.