హైదరాబాద్‌: గతంలో మంత్రిగా పనిచేసిన ఈటల రాజేందర్‌ బలహీనవర్గాల కోసం ఏమైనా చేశారా? అని సీఎం రేవంత్‌రెడ్డి ప్రశ్నించారు. మల్కాజిగిరి కాంగ్రెస్‌ అభ్యర్థి సునీతా మహేందర్‌రెడ్డికి మద్దతుగా ఉప్పల్‌లో నిర్వహించిన రోడ్‌ షోలో రేవంత్‌ ప్రసంగించారు. పంపకాల్లో కేసీఆర్‌తో తేడా వచ్చి రాజేందర్‌ భారాస నుంచి బయటకు వచ్చారని విమర్శించారు. అంతేతప్ప ప్రజల కోసం కాదని ఆరోపించారు. ఉప్పల్‌లో పనులు నిలిచిపోయిన ఫ్లైఓవర్‌ గురించి కేంద్రాన్ని ఎప్పుడైనా ఈటల అడిగారా అని నిలదీశారు. కరోనా సమయంలో సీఎస్‌ఆర్‌ నిధులు దోచుకుతింటుంటే నోరెత్తలేదన్నారు.

‘‘లోక్‌సభ ఎన్నికల్లో భారాస పోటీలోనే లేదు. ఆర్టీసీ బస్సుల్లో ఇప్పటికే 35 కోట్ల మంది మహిళలు ప్రయాణించారు. 40 లక్షల కుటుంబాలు రూ.500కే సిలిండర్‌ తీసుకుంటున్నాయి. దాదాపు 50లక్షల కుటుంబాలు 200 యూనిట్ల వరకు ఉచిత కరెంటు పొందుతున్నాయి. కాంగ్రెస్‌ శ్రేణుల ఉత్సాహం ఈనెల 13 వరకు ఇలాగే కొనసాగాలి. సునీతా మహేందర్‌రెడ్డిని భారీ మెజార్టీతో గెలిపించాలి’’ అని రేవంత్‌ విజ్ఞప్తి చేశారు.