కరప, న్యూస్‌టుడే: వైకాపా నాయకుల ఆదేశాల మేరకు వాలంటీర్ల వాట్సప్‌ గ్రూపుల్లో యథేచ్ఛగా ఎన్నికల ప్రచారం సాగుతోంది. వాలంటీర్లు సెల్‌ఫోన్లను అధికారులకు అప్పగించినప్పటికీ యాభై కుటుంబాలకు చెందిన లబ్ధిదారులతో వారు నిర్వహించిన వాట్సప్‌ గ్రూపుల్లో ఇతరుల ద్వారా ప్రచారానికి సంబంధించిన పోస్టులు పెడుతున్నారు. తమ ప్రచారాన్ని ఎక్కువ వాట్సప్‌ గ్రూపుల ద్వారా ఓటర్లకు తొందరగా చేరవేయడం కోసం వైకాపా వర్గాలు ఇలాంటి చర్యలకు పాల్పడుతున్నాయి. కాకినాడ జిల్లా కాకినాడ గ్రామీణ నియోజకవర్గంలోని కరప మండలంలో కొన్ని వాలంటీర్ల గ్రూపుల్లో ఈ మేరకు పోస్టులు పెడుతుండటం గమనార్హం. కురసాల కన్నబాబుకు ఓటేయాలంటూ ప్రచారం సాగిస్తుండటం కనిపిస్తోంది. ఈ విషయంపై కరప ఎంసీసీ అధికారి కె.అప్పారావును వివరణ కోరగా.. జనసేన పార్టీ వారు ఈ అంశాన్ని తమ దృష్టికి తీసుకొచ్చారని చెప్పారు. బాధ్యులపై చర్యల కోసం పోలీసులకు ఫిర్యాదు చేసినట్లు చెప్పారు.