బెంజిసర్కిల్‌ వంతెనపై అధికారిక ట్రయల్‌రన్‌

విజయవాడ: నగరంలో ప్రతిష్ఠాత్మకంగా నిర్మించిన బెంజిసర్కిల్‌ వంతెనపై అధికారికంగా ట్రయల్‌రన్‌ ప్రారంభించారు. కలెక్టర్‌ ఇంతియాజ్‌, నగర పోలీసు కమిషనర్‌ ద్వారకా తిరుమలరావు ట్రయల్‌ రన్‌ నిర్వహించిన అనంతరం వంతెనపైకి వాహనాలను అనుమతించారు. రూ.80కోట్ల వ్యయంతో 2017లో వంతెన నిర్మాణపనులను ప్రారంభించారు. 2.3కి.మీ మేర నిర్మాణాన్ని పూర్తి చేసి నగరవాసులతో పాటు వాహనదారులకు అందుబాటులోకి తీసుకొచ్చారు. కొన్ని రోజులపాటు పైవంతెనపై వాహనాల రాకపోకలు పరిశీలించిన తర్వాత చిన్నపాటి లోటుపాట్లను సరిచేసి మార్చిలో అధికారికంగా ప్రారంభించనున్నట్లు అధికారులు తెలిపారు. 

నగరంలోని నోవాటెల్ హోటల్ నుంచి రామలింగేశ్వరనగర్ బ్రిడ్జి వరకు ఒకవైపు పూర్తయిన ఈ వంతెనతో ఏలూరు నుంచి చెన్నై వైపు వెళ్లే వాహనదారులకు ట్రాఫిక్ ఇక్కట్లు తప్పనున్నాయి. 7 నుంచి 8 నెలలుగా జాతీయ రహదారి ప్రాధికార సంస్థ అధికారులతో నిత్యం చర్చలు జరిపి  పైవంతెనను త్వరితగతిన వాహనదారులకు అందుబాటులోకి వచ్చేలా చర్యలు చేపట్టామని కలెక్టర్ ఇంతియాజ్ వెల్లడించారు. పైవంతెనకు రెండు వైపులా వేగ నియంత్రికలు ఏర్పాటు చేయాలని జాతీయ రహదారి ప్రాధికార సంస్థ అధికారులకు సూచించినట్లు కలెక్టర్ తెలిపారు.

ఫొటోగ్యాలరీ కోసం క్లిక్‌ చేయండి