ఉపరాష్ట్రపతిని కలిసిన అమరావతి రైతులు

దిల్లీ: అమరావతి రైతులు, ఐకాస నేతలు మంగళవారం ఉదయం దిల్లీలో ఉపరాష్ట్రపతి వెంకయ్యనాయుడిని కలిసి రాజధాని సమస్యలు వివరించారు. రాజధానిలో భూములు ఇచ్చిన రైతులకు న్యాయం చేయాలని కోరారు. రైతులు, మహిళలు, నిరసనకారులపై పోలీసుల దాడులను వివరించారు. రైతులపై అక్రమ కేసులు బనాయించి వేధిస్తున్నారని ఆవేదన వ్యక్తం చేశారు. రాజధాని తరలించకుండా చూడాలని, కేంద్ర ప్రభుత్వం వెంటనే జోక్యం చేసుకుని తమకు న్యాయం చేయాలని విజ్ఞప్తి చేశారు.

‘‘రాష్ట్రపతిని కూడా సమయం కోరాం, అపాయింట్‌మెంట్‌ రాగానే వెళ్లి అమరావతి అంశాన్ని వివరిస్తాం. కేంద్ర మంత్రులు రాజ్‌నాథ్‌సింగ్‌, నిర్మలా సీతారామన్‌ సహా భాజపా పెద్దలు, ప్రతిపక్ష నేతలు రాహుల్‌ గాంధీ, సోనియా గాంధీ, సీతారాం ఏచూరిని కూడా కలిసి అమరావతిని సమస్యను వివరిస్తాం’’ అని రైతులు తెలిపారు. రాజధాని రైతులతోపాటు ఎంపీలు గల్లా జయదేవ్‌, సీతారామలక్ష్మి తదితరులు ఉపరాష్ట్రపతిని కలిసిన వారిలో ఉన్నారు.