పెళ్లికి వెళ్లి ఇరుక్కుపోయిన వరంగల్‌ వాసులు

సూరత్‌లో ఇరుక్కుపోయిన వరంగల్‌ వాసులు 

వరంగల్‌: రాష్ట్రాలు దాటి పెళ్లికి వెళ్లి కష్టాలు కొనితెచ్చుకున్నారు వరంగల్‌ వాసులు. ఒకే గదిలో నెల రోజులుగా ఉంటూ అవస్థలు పడుతున్నారు. వరంగల్‌ గ్రామీణ జిల్లా  గవచెర్ల, షాపూర్‌, రామచంద్రాపురం, బొల్లికుంట్ల గ్రామాలకు చెందిన 40 మంది గత నెల 20న బంధువుల పెళ్లి కోసం సూరత్‌కు వెళ్లారు. వీరిలో 15 మంది మరుసటి రోజే వచ్చినా మిగిలిన 25 మంది అక్కడే ఉండిపోయారు. అనంతరం లాక్‌డౌన్‌ ప్రకటించిన నేపథ్యంలో తిరిగి రాలేని పరిస్థితి. ఒక చిన్న గదిని అద్దెకు తీసుకోగా స్థలం సరిపోకపోవడంతో వంతుల వారీగా నిద్ర పోతున్నారు. బియ్యం, కూరగాయలు లేకపోవడంతో రోజూవారి జీవనాన్ని సాగించలేక తీవ్ర ఇబ్బందులు పడుతున్నారు. ఎలాగైనా స్వగ్రామానికి పంపించాలని, ఇక్కడికి వచ్చాక క్వారంటైన్‌లో ఉండేందుకైనా సిద్ధమేనని వారు చెబుతున్నారు.