రెండు గోడల మధ్య ఇరుక్కున్న చిన్నారి!

ఒడిశా: మేడపై ఆడుకుంటున్న రెండున్నరేళ్ల బాలిక 15 అడుగుల ఎత్తు నుంచి కిందికి పడి.. ఆరు అంగుళాల స్థలం ఉన్న రెండు గోడల సందులో ఇరుక్కుపోయింది. ఒడిశా రాష్ట్రం కటక్‌లోని   చౌడ్‌వార్‌ ప్రాంతంలో శనివారం సాయంత్రం ఈ ప్రమాదం జరిగింది. బాలిక అరుపులు విన్న తల్లి.. వెంటనే కుటుంబ సభ్యులను అప్రమత్తం చేశారు. చుట్టుపక్కలవారు చేరుకున్నారు. సమాచారం అంది.. హుటాహుటిన వచ్చిన అగ్నిమాపక సిబ్బంది గోడలకు రంధ్రం చేసి బాలికను సురక్షితంగా బయటకు తీశారు. అనంతరం చిన్నారిని ఓ ప్రైవేటు ఆస్పత్రికి తరలించారు. ప్రస్తుతం ఆమె ఆరోగ్యకరంగానే ఉంది.