Telangana News: వాహనదారులకు శుభవార్త... ట్రాఫిక్‌ పెండింగ్‌ చలానాలపై రాయితీ?

హైదరాబాద్: ట్రాఫిక్‌ చలానాలు చెల్లించలేక ఇబ్బంది పడుతున్న వాహనదారులకు శుభవార్త. గత కొన్నేళ్లుగా చలాన్లు పెండింగ్‌లో ఉండటం, వాహనదారులు చెల్లించలేక చేతులెత్తేయడంతో వారి పట్ల ట్రాఫిక్‌ పోలీసులు కరుణించారు. తెలంగాణలో గత 8 ఏళ్లుగా దాదాపు రూ.600 కోట్ల మేర చలాన్లు పెండింగ్‌లో ఉన్నట్టు సమాచారం. దీంతో పెండింగ్‌లో ఉన్న చలాన్లు క్లియర్‌ చేసేందుకు వాటిపై రాయితీ ఇవ్వాలని అధికారులు నిర్ణయించారు. అయితే, చలాన్లపై ఎంత రాయితీ ఇవ్వలన్న దానిపై కసరత్తు జరుగుతోంది. రాయితీ విషయమై చర్చించేందుకు హైదరాబాద్‌ సీపీ సీవీ ఆనంద్‌ ఆధ్వర్యంలో ఇవాళ ఉన్నతాధికారులు భేటీ అయ్యారు. భేటీలో పాల్గొన్న హైదరాబాద్‌ ట్రాఫిక్‌ సంయుక్త కమిషనర్‌ రంగనాథ్‌ మాట్లాడుతూ... చలానాల రాయితీ విషయమై త్వరలో నిర్ణయిస్తామని తెలిపారు.