Vijayawada: దుర్గగుడి వద్ద రోడ్డుపై విరిగిపడిన కొండచరియలు

ఇంద్రకీలాద్రి: గత రెండు రోజులుగా కురిసిన భారీ వర్షాల కారణంగా విజయవాడ దుర్గ గుడి కేశ ఖండన శాల సమీపంలో కొండ చరియలు విరిగిపడ్డాయి. దీంతో జాతీయ రహదారి పై వాహనాల రాకపోకలు నిలిచిపోయాయి. దుర్గ గుడి అధికారులు ప్రత్యేక క్రేన్‌లు తెప్పించి రోడ్డుపై పడిన కొండ రాళ్లను తొలగిస్తున్నారు. సమీపంలోని సబ్‌వేను కూడా మూసివేశారు. 

దుర్గమ్మ దర్శనానికి వచ్చే భక్తులను ఘాట్‌ రోడ్డు వైపు కాకుండా మల్లికార్జున మండపం మెట్లమార్గం వైపు మళ్లించారు. ఈ ఘటనలో సబ్‌వే సమీపంలో నిలిపిన ఆరు ద్విచక్ర వాహనాలు ధ్వంసమయ్యాయి. కొండరాళ్లు పూర్తిగా తొలగిస్తే తప్ప ట్రాఫిక్‌ పునరుద్ధరణ సాధ్యపడదని వన్‌టౌన్‌ ట్రాఫిక్‌ సీఐ సుధాకర్‌ తెలిపారు. వాహనాల రాకపోకలను కనకదుర్గ పైవంతెన నుంచి కొనసాగిస్తామని తెలిపారు.