Hyderabad: పంద్రాగస్టు వేడుకలు.. గోల్కొండ పరిసర ప్రాంతాల్లో ఆంక్షలు ఇలా..

హైదరాబాద్‌: స్వాతంత్ర్య దినోత్సవం సందర్భంగా గోల్కొండ పరిసర ప్రాంతాల్లో పోలీసులు ట్రాఫిక్ ఆంక్షలు విధించారు. ఆగస్టు 15న ఉదయం 7 నుంచి మధ్యాహ్నం 12 గంటల వరకు ఈ ఆంక్షలు అమల్లో ఉండనున్నాయి. ఆంక్షల సమయంలో రాందేవ్‌గూడ నుంచి గోల్కొండ కోటకు వచ్చే రోడ్డు పూర్తిగా మూసివేయనున్నారు. వేడుకలకు హాజరయ్యే వారికి ఇప్పటికే పాసులు జారీ చేసిన అధికారులు.. ఆ మార్గంలో A గోల్డ్, A పింక్‌, B బ్లూ పాసులు కలిగిన వాహనాలకు మాత్రమే అనుమతి ఇవ్వనున్నారు. పాసులు ఉండి సికింద్రాబాద్ నుంచి వచ్చేవారు బంజారాహిల్స్ - మెహదీపట్నం - రేతిబౌలి - నాలానగర్ - లంగర్ హౌస్ వంతెన - రాందేవ్‌గూడ మీదుగా గోల్కొండ చేరుకోవాలని సూచించారు. 

A గోల్డ్ పాస్ కలిగిన వారు కోట ప్రధాన ద్వారం ఎదురుగా ఉన్న స్థలంలో పార్కింగ్ చేసుకోవాలని వెల్లడించారు. A పింక్ పాస్ వారు గోల్కొండ బస్ స్టాప్‌లో, B బ్లూ పాస్ కలిగిన వారు ఫుట్‌బాల్‌ మైదానంలో పార్కింగ్ చేసుకోవాలని సూచించారు. C గ్రీన్ పాస్ కలిగిన వారు సెవెన్ టూబ్స్‌, బంజారా దర్వాజా మీదుగా వచ్చి ఒవైసి జీహెచ్‌ఎంసీ మైదానంలో పార్కింగ్ చేసుకోవాలన్నారు. D రెడ్ పాస్ కలిగిన వారు షేక్‌పేట - టోలిచౌక్‌ - బంజారా దర్వాజా మీదగా వచ్చి ప్రియదర్శిని స్కూల్ మైదానంలో పార్కింగ్ చేసుకోవాలని సూచించారు. E బ్లాక్ పాస్ కలిగిన సాధారణ ప్రజలు హుడా పార్క్‌లో పార్కింగ్ చేసుకొని వేడుకలకు హాజరు కావాలని సూచించారు.