YouTuber: 42 సెకన్లలో ₹1.75 కోట్లు సంపాదించిన యూట్యూబర్‌

కాలిఫోర్నియా: ఓ యూట్యూబర్​ ఓవర్​ నైట్​ కోటీశ్వరుడయ్యాడు. క్షణాల వ్యవధిలోనే కోట్లు సంపాదించాడు. కేవలం 42 సెకెన్లలోనే రూ. 1.75కోట్ల ఆర్జించాడు. క్రిప్టో వంటి డిజిటల్ కరెన్సీ అయిన నాన్-ఫంగబుల్ టోకెన్‌(ఎన్‌ఎఫ్‌టీ)లతో సెకన్ల వ్యవధిలో ఈ మొత్తాన్ని సంపాదించి ఓవర్‌నైట్​ సెన్సేషన్‌గా మారాడు. ఆయనే అమెరికాకు చెందిన జొనాథన్​ మా.

కాలిఫోర్నియాకు చెందిన ఈ యువ యూట్యూబర్​ ‘జోమా టెక్’ పేరుతో కంప్యూటర్ ప్రోగ్రామింగ్, క్రిప్టో కరెన్సీ, టెక్నాలజీకి సంబంధించిన వీడియోలను షేర్ చేస్తుంటాడు. ఆయన ఛానెల్​కు 16 లక్షల మందికి పైగా ఫాలోవర్లు ఉండటం విశేషం. అయితే ఈ నెల ప్రారంభంలో ‘వ్యాక్సీడ్​ డాగ్​గోస్​’ పేరుతో జొనాథన్ మా ఎన్​ఎఫ్​టీ (నాన్-ఫంజిబుల్ టోకెన్) కలెక్షన్​ను విడుదల చేశారు. ఇదే ఆయనకు 2,34,000 డాలర్లు (సుమారు రూ. 1.75 కోట్లు) తెచ్చి పెట్టింది. అది కూడా కేవలం 42 సెకన్లలోనే. ఖర్చులు పోనూ రూ.1.40 కోట్లు మిగిలాయని అంచనా వేస్తున్నారు. సినిమాలకు దర్శకత్వం వహించాలని ఎప్పటినుంచో అనుకుంటున్నానని, ఈ డబ్బులతో మరికొద్ది రోజుల్లోనే ఆ కోరికను తీర్చుకోనున్నట్లు జొనాథన్‌ ఆనందం వ్యక్తం చేశారు. గతంలో ఫేస్​బుక్​, గూగుల్​ లాంటి కంపెనీల్లో సాఫ్ట్​వేర్ ఉద్యోగిగా కూడా పని చేసినట్లు తెలిపారు.

ఏదైనా డిజిటల్ కళాకృతిని బ్లాక్‌చెయిన్ టెక్నాలజీని ఉపయోగించి డిజిటల్ రూపంలో నిలువ చేయడాన్ని (ఓన‌ర్‌షిప్ సర్టిఫికేట్‌) ‘ఎన్ఎఫ్‌టీ’గా పేర్కొంటారు. ఎన్​ఎఫ్​టీలను ఉపయోగించి ఫొటోలు, వీడియోలు, ఆడియో ఇతర రకాల ఫైల్స్​ను దాచుకోవచ్చు. అయితే.. ఈ విధంగా కొనుగోలు చేసిన ప్రత్యేక డిజిటల్ ఆస్తిని నిజంగా మనచేతికి ఇవ్వరు.