YS Avinash Reddy - CBI: విశ్వభారతి ఆస్పత్రిలోనే అవినాష్‌.. రాత్రంతా అనుచరుల జాగారం

కర్నూలు: కడప ఎంపీ అవినాష్ రెడ్డి కర్నూలు విశ్వభారతి ఆస్పత్రిలోనే ఉన్నారు. తల్లి శ్రీలక్ష్మితో పాటు ఆయన అక్కడే ఉంటున్నారు. దీంతో ఆయన అనుచరులు కూడా ఆస్పత్రి వద్దే రాత్రంతా జాగారం చేశారు. కర్నూలు జిల్లాకు చెందిన వైకాపా నేతలు.. ఆ పార్టీ కార్యకర్తలు, నేతలకు తిండి, వసతి సౌకర్యాలు సమకూర్చారు. మరోవైపు ఆస్పత్రి వద్ద పోలీసు బందోబస్తు కొనసాగుతోంది. ఈనెల 19న తల్లి శ్రీలక్ష్మిని అవినాష్‌ రెడ్డి ఆస్పత్రిలో చేర్పించిన విషయం తెలిసిందే.

సోమవారం ఎంపీ అవినాష్‌రెడ్డిని అరెస్ట్‌ చేసేందుకు ఆస్పత్రికి చేరుకున్న రెండు సీబీఐ బృందాల్లో ఒక బృందం రాత్రి కర్నూలు నుంచి హైదరాబాద్‌కు వెళ్లిపోయింది. మరో బృందం మాత్రం పోలీసు రెస్ట్‌హౌస్‌లో ఉంది. మరోవైపు అవినాష్‌ ముందస్తు బెయిల్‌ పిటిషన్‌పై నేడు సుప్రీంకోర్టులో విచారణ జరగనుంది. హైకోర్టు తుది ఉత్తర్వులిచ్చేదాకా అరెస్టు చేయవద్దని.. ఈ మేరకు సీబీఐకి ఆదేశాలు ఇవ్వాలని ఎంపీ పిటిషన్‌ దాఖలు చేసిన విషయం తెలిసిందే.