Total Solar Eclipse: సంపూర్ణ సూర్యగ్రహణం.. మన ‘ఆదిత్య’కు చిక్కదట..!

ఇంటర్నెట్‌ డెస్క్‌: విశ్వంలో నేడు అద్భుత దృశ్యం ఆవిష్కృతం కానుంది. ఉత్తర అమెరికా, కెనడా మీదుగా నేడు సంపూర్ణ సూర్యగ్రహణం (Total Solar Eclipse) ఏర్పడనుంది. ఈ ఏడాది సంభవించే అతిపెద్ద ఖగోళ ఘటన, పైగా అరుదుగా ఏర్పడే సంపూర్ణ గ్రహణం కావడంతో దీన్ని చూసేందుకు ప్రజలు ఆసక్తిగా ఎదురుచూస్తున్నారు. అయితే, ఈ ఘట్టాన్ని అంతరిక్షంలో ఉన్న మన ‘ఆదిత్య’ మాత్రం చూడలేడట..! ఇందులో ఇస్రో (ISRO) తప్పేం లేదండోయ్‌.. ‘ఆదిత్య ఎల్‌ 1 (Aditya L1)’ను ఉంచిన స్థానమే ఇందుక్కారణం.

సూర్యుడిని నిరంతరం అధ్యయనం చేసేందుకు వీలుగా లాగ్రాంజ్‌ పాయింట్‌ 1 (ఎల్‌ 1) చుట్టూ ఉన్న కక్ష్యలో దీన్ని ప్రవేశపెట్టిన విషయం తెలిసిందే. దీంతో గ్రహణాల ప్రభావం లేకుండా ‘ఆదిత్య ఎల్‌ 1’కు భానుడు ప్రతిక్షణం కన్పిస్తాడు. సాధారణంగా సూర్యుడికి భూమికి మధ్యలో చంద్రుడు అడ్డుగా వచ్చినప్పుడు ఈ గ్రహణం ఏర్పడుతుంది. అయితే, నేటి సంపూర్ణ సూర్యగ్రహణం సమయంలో భానుడిని పూర్తిగా కమ్మేసే చంద్రుడు ఈ శాటిలైట్‌కు వెనుకవైపు ఉంటాడు. అంటే.. సూర్యుడికి, చంద్రుడికి మధ్యలో అన్నమాట..! అందుకే గ్రహణ ఘట్టాన్ని ‘ఆదిత్య ఎల్‌ 1’ వీక్షించలేదని ఇస్రో ఛైర్మన్‌ ఎస్‌. సోమనాథ్‌ వెల్లడించారు.

అయితే, గ్రహణ సమయంలో సూర్య కిరణాల ప్రభావం ఎలా ఉండనుందనే విషయాలను ఈ మిషన్‌ పరిశీలించనుంది. క్రోమోస్పియర్‌, నక్షత్రాల కరోనాను మరింత అధ్యయనం చేసేందుకు ఈ సమాచారం ఉపయోగపడుతుందని ఇస్రో శాస్త్రవేత్తలు చెబుతున్నారు. గతేడాది సెప్టెంబరులో ‘ఆదిత్య ఎల్‌ 1’ను ప్రయోగించిన సంగతి తెలిసిందే. దాదాపు నాలుగు నెలల పాటు రోదసిలో ప్రయాణించిన శాటిలైట్‌.. ఈ ఏడాది జనవరిలో భూమికి 15 లక్షల కిలోమీటర్ల దూరంలో ఉన్న లాగ్రాంజ్‌ పాయింట్‌-1ను చేరుకుంది. దాని చుట్టూ ఉన్న కక్ష్యలో పరిభ్రమిస్తూ అధ్యయనాలు సాగిస్తోంది.

ఇక, నేటి సంపూర్ణ సూర్య గ్రహణం మెక్సికో, అమెరికా, కెనడాల మీదుగా ప్రయాణించనుంది. ఈ ప్రాంతాల్లో గ్రహణ ప్రభావాన్ని బట్టి కొన్ని నిమిషాల పాటు చీకటి కమ్ముకోనుంది. అయితే, భారత్‌లో దీని ప్రభావం లేదు. మన కాలమానం ప్రకారం నేటి రాత్రి 9 గంటల తర్వాత నుంచి రేపు తెల్లవారుజామున 2.22 గంటల వరకు గ్రహణ కాలం ఉంది.