G20 venue: జీ20 వేదిక వద్ద వరదనీటి వీడియో.. కేంద్రం ఏం చెప్పిందంటే..?

దిల్లీ: జీ20 శిఖరాగ్ర సదస్సు నిర్వహణకు కొత్తగా నిర్మించిన ‘భారత్‌ మండపం’లో కొద్దిపాటి వర్షానికే నీరు చేరిందంటూ కాంగ్రెస్‌(Congress) విమర్శలు గుప్పించింది. అలాగే ఒక వీడియోను కూడా విడుదల చేసింది. నీటితో నిండిన కారిడార్లలో అధికారులు నడుచుకుంటూ వెళ్లడం ఆ వీడియోలో కనిపించింది. అయితే ఆరోపణలను కేంద్రం తిప్పికొట్టింది. (G20 venue)

విపక్షాలు చేస్తోన్న విమర్శల్లో వాస్తవం లేదని కేంద్ర ప్రభుత్వం ఆధ్వర్యంలోని ప్రెస్‌ ఇన్ఫర్మేషన్‌ బ్యూరో ఫ్యాక్ట్ చెక్‌ (PIB Fact Check) విభాగం నిర్థారించింది. ఈ వీడియోలోని దృశ్యాలు తప్పుదోవపట్టించేలా ఉన్నాయని పేర్కొంది. రాత్రి సమయంలో కురిసిన వర్షాలతో జీ20 వేదిక ప్రాంగణంలో కొద్దిపాటి నీరు చేరిందని, ఆ నీటిని తొలగించినట్లు వెల్లడించింది. ప్రస్తతం అక్కడ నీరు నిలిచిలేదని చెప్పింది.

ఈసారి ఓడే ప్రసక్తే లేదు: కమల్‌హాసన్‌

భారత్‌ మండపం వద్ద కొద్దిపాటి వర్షానికే నీరు నిల్వడమనేది మోదీ ప్రభుత్వ హయాంలో జరిగిన ‘డొల్ల అభివృద్ధి’కి నిదర్శనమని కాంగ్రెస్‌ దుయ్యబట్టింది. ఈ ప్రాంగణాన్ని నిర్మించడానికి రూ.2,700 కోట్లు ఖర్చు అయిందని,  అంత డబ్బు దోచుకొని, ఇంత నాసిరకంగా పనులు చేసిందెవరని ప్రశ్నించింది. భయం కారణంగా ఈ దేశ ప్రజలు మీకు చెప్పలేని ఒక విషయాన్ని భగవంతుడే సెలవిచ్చాడని కాంగ్రెస్ ప్రధాన కార్యదర్శి ప్రియాంకాగాంధీ(Priyanka Gandhi) మండిపడగా..  కొద్దిపాటి వర్షానికే ‘అభివృద్ధి’ తేలియాడుతోందని మరో నేత రణదీప్‌ సూర్జేవాలా ఎద్దేవా చేశారు.