ఎంబీఏ విద్యార్థినిపై గ్యాంగ్‌ రేప్‌ ఘటన.. హోంమంత్రి వ్యాఖ్యల్ని తప్పుబట్టిన సీఎం!

దిల్లీ: మైసూరు నగర శివారులో ఎంబీఏ విద్యార్థినిపై మంగళవారం రాత్రి జరిగిన సామూహిక అత్యాచార ఘటనపై కర్ణాటక సీఎం బసవరాజ్‌ బొమ్మై సీరియస్‌ అయ్యారు. నేరస్థులను త్వరలోనే పట్టుకొనేందుకు ప్రత్యేక దర్యాప్తు బృందాన్ని ఏర్పాటు చేయనున్నట్టు వెల్లడించారు. బాధితురాలికి న్యాయం చేస్తామని, ఈ విషయంలో ఎలాంటి రాజీ ఉండదని స్పష్టంచేశారు. రెండు రోజుల పర్యటన నిమిత్తం దిల్లీకి వచ్చిన ఆయన మీడియాతో మాట్లాడారు. డీజీపీ, తాను బెంగళూరు వెళ్లాక తక్షణమే ప్రత్యేక దర్యాప్తు బృందాన్ని ఏర్పాటు చేస్తామన్నారు.

ఈ ఘటనపై కర్ణాటక హోంమంత్రి అరగ జ్ఞానేంద్ర చేసిన వ్యాఖ్యలను సీఎం తప్పుబట్టారు. ఆ విద్యార్థిని తన స్నేహితుడితో కలిసి ఎడారిలాంటి ఈ ప్రాంతానికి వచ్చి ఉండకూడదని హోంమంత్రి చేసిన వ్యాఖ్యలతో తాను ఏకీభవించడం లేదని బొమ్మై అన్నారు. దీనిపై వివరణ ఇవ్వాలని ఆయనకు సూచించినట్టు చెప్పారు. ఈ కేసులో సమగ్ర దర్యాప్తు చేయాలని, ఎప్పటికప్పుడు జరుగుతున్న పరిణామాలను తనకు తెలియపరచాలని కూడా అధికారులను ఆదేశించినట్టు తెలిపారు. మరోవైపు ఈ ఘటనలో గాయపడిన బాధితురాలితో పాటు ఆమె స్నేహితుడు ఓ ప్రైవేటు ఆస్పత్రిలో చికిత్స పొందుతున్నారు.