Pakistan: సరిహద్దుల్లో ఈ ఏడాది పాక్‌ డ్రోన్ల కదలికలు పెరిగాయ్‌: బీఎస్‌ఎఫ్‌

ఇంటర్నెట్‌డెస్క్: ఈ ఏడాది పాక్‌ వైపు నుంచి ఆయుధాలు, మాదక ద్రవ్యాలతో వచ్చే డ్రోన్ల సంఖ్య పెరిగినట్లు భారత భద్రతా దళాలు పేర్కొంటున్నాయి. ఇటీవల కాలంలో డ్రోన్ల ముప్పు పెరుగుతోందని ఆందోళన బీఎస్‌ఎఫ్‌ డైరెక్టర్‌ జనరల్‌ పంకజ్‌ కుమార్‌ సింగ్‌  ఆందోళన వ్యక్తంచేశారు. మారుమూల ప్రాంతాలకు వెళ్లి పెట్రోలింగ్‌ నిర్వహించినా.. యాంటీ డ్రోన్‌ పరికరాలను అమర్చినా.. ముష్కరులు వేరే మార్గాలను అన్వేషిస్తున్నట్టు తమ దర్యాప్తుల్లో తెలుస్తోందన్నారు. 

ఈ నేపథ్యంలో బీఎస్ఎఫ్‌ క్యాంపస్‌లో దేశీయంగా అభివృద్ధి చేసిన డ్రోన్‌ ప్రయోగశాలను గతేడాది సెప్టెంబర్‌లో ఏర్పాటు చేశారు. పాక్‌ సరిహద్దుల్లో కూల్చేసిన డ్రోన్ల నుంచి సమాచారం వెలికి తీయడానికి ఇక్కడికి పంపుతారు. దీంతోపాటు డ్రోన్లను గుర్తించే టెక్నాలజీపై ప్రయోగాలు చేస్తున్నారు. దీంతో డ్రోన్‌ ఫ్లైట్‌పాత్‌లను గుర్తించడం, నేరగాళ్ల చిరునామాలు కనుగొనడం వంటి అంశాలపై భద్రతా సంస్థలు దృష్టిపెట్టాయి. భారత్‌-పాక్‌ సరిహద్దుల్లో దాదాపు 3,000 కిలోమీటర్ల మేరకు బీఎస్ఎఫ్‌ పహారా కాస్తోంది. గుజరాత్‌, రాజస్థాన్‌, పంజాబ్‌, జమ్మూలు దీని పరిధిలోకి వస్తాయి.