‘క్లోరోక్విన్‌ వల్ల తీవ్రమైన సైడ్‌ ఎఫెక్ట్స్‌ ఉంటాయి’

హెచ్చరించిన అమెరికా ‘ఫుడ్‌ అండ్‌ డ్రగ్‌ అడ్మినిస్ట్రేషన్‌’

వాషింగ్టన్‌: కరోనా వైరస్‌ చికిత్సలో ఆశాజనక ఫలితాలిస్తుందని భావిస్తున్న మలేరియా ఔషధం హైడ్రాక్సీక్లోరోక్విన్‌ వల్ల ‘సైడ్‌ ఎఫెక్ట్స్‌’ ఉంటాయని అమెరికా ఫుడ్‌ అండ్‌ డ్రగ్‌ అడ్మినిస్ట్రేషన్‌(ఎఫ్‌డీఏ) హెచ్చరించింది. దీని వల్ల తీవ్ర హృదయ సంబంధిత సమస్యలు సైతం తలెత్తే ప్రమాదం ఉందని తెలిపింది. ఈ పరిణామాల గురించి ఔషధానికి సంబంధించిన వివరాల్లో ముందుగానే పొందుపరిచి ఉందని గుర్తుచేసింది. రోగి పరిస్థితిని ఆస్పత్రిలో ఎప్పటికప్పుడు పరీక్షిస్తూ.. ఈ సైడ్‌ ఎఫెక్ట్స్‌ ప్రభావాన్ని తగ్గించొచ్చని తెలిపింది. కరోనా సోకిన వారి ఆరోగ్య పరిస్థితిని బట్టి ఏ ఔషధం వాడాలో అక్కడ ఉండే వైద్య సిబ్బందే జాగ్రత్తగా నిర్ణయించాలని సూచించింది.

కొవిడ్‌-19పై పోరాడే సమర్థమైన మందు కోసం ఇంకా ప్రయోగాలు జరుగుతున్నాయని.. అప్పటి వరకు ఈ సైడ్‌ ఎఫెక్ట్స్‌ని దృష్టిలో ఉంచుకొనే చికిత్స అందజేయాలని ఎఫ్‌డీఏ సూచించింది. ఇప్పటికే అత్యవసర పరిస్థితుల్లో మాత్రమే హైడ్రాక్సీక్లోరోక్విన్‌ ఔషధాన్ని వాడేందుకు అనుమతి ఇచ్చామని తెలిపింది. ఆస్పత్రుల్లో చేరి తీవ్ర అనారోగ్య పరిస్థితులు ఎదుర్కొంటున్న కొవిడ్‌-19 రోగులకు మాత్రమే వైద్యుల సూచన మేరకు వినియోగించాలని స్పష్టం చేసింది. ఈ డ్రగ్‌ వాడకానికి సంబంధించిన పూర్తి ప్రక్రియను వైద్యులకు అందుబాటులో ఉంచాల్సిన అవసరం ఉందని పేర్కొంది. 

అమెరికాలో వైరస్‌ విజృంభిస్తున్న తరుణంలో కొన్ని రోజుల క్రితం కొవిడ్‌-19 రోగుల చికిత్సలో హైడ్రాక్సీక్లోరోక్విన్‌ మాత్రల్ని వాడేందుకు ఎఫ్‌డీఏ అనుమతి ఇచ్చిన విషయం తెలిసిందే. ఇటు భారత్‌లోనూ అత్యవసర పరిస్థితుల్లో రోగికి దగ్గరగా ఉన్న వ్యక్తులకు ఈ ఔషధాన్ని ఇవ్వాలని భారత వైద్య పరిశోధన మండలి(ఐసీఎంఆర్‌) సూచించింది. అయితే, దీని వల్ల కొవిడ్‌-19 నయమవుతుందన్న అధికారిక ఆధారాలు మాత్రం ఇప్పటి వరకు లేవు. కరోనా వైరస్‌ను తుదముట్టించే సామర్థ్యం వీటికి ఉందో లేదో ఇంకా ప్రయోగాలు జరుగుతూనే ఉన్నాయి.

ఇవీ చదవండి..

ముప్పేట దాడి..!

ట్రంప్‌ ప్రమాదకర ‘కరోనో’ పాయం